CO TYDZIYŃ PO NASZYMU: Kiejsi s knefli i rejfeszlusów szło dobrze żyć

Dziołcho stela,
nejwiynkszym problymym dlo specyjalistów gwarowych sóm naleciałości, czy to z polski czy z czeski rzeczy. Nikierych skoro wrzód łobrożo, jak słyszóm "przistanek" albo "zastawka". Ale przed naleciałościami sie nie ubróni żodyn jynzyk. Dyć sie jyny spómnij na "haltesztele" - zicher znosz to słowo. Kogosi aż trzynsie, jak słyszy jakisi nimiecki słowo, bo se myśli, że przeca mómy dość naszych, piekniejszych... Myślym se, że każdy jynzyk przechodzi swojóm ewolucyjóm a na nowe wiecy, kiere przichodzóm, trzeba hladać nowe słowa. A kaj ich hladać? Kiejsi naporyndzi była niymczyzna, teraz po prawej strónie Olzy je to polski a po lewej czeski. Gdyby gwara była jynzykym skanzynowym, to by jóm było możne obrónić przed naleciałościami a mówili by my jyny ło drzewiónkach, szczypach a petryłolkach. Ale gwara żyje (jo se myślym że żyje) i rozwijo sie w roztomajtych regiónach kapke inaczy. Co do rozdziołów miyndzy Twojim rzóndzynim a mojim wykłodanim - ni ma tu kodyfikacyje, tóz rozdzioły muszóm być. Jak by ale kodyfikacyja była - już by to nie była gwara, ale jynzyk literacki. Tak, jak sie to stało z kaszubskim . A jak chcesz rozmówki po naszymu, przyndź w Cieszynie na czeskóm stróne do polskigo gimnazjum (liceum) na ulicy Hawliczka. Tam poznosz, że jynzykym macierzystym studyntów je cieszyński a jynzyki polski i czeski sóm nauczane jako obce (jasne że uż zaś przesadzóm, już słyszym ty kómyntorze pełne świyntego łoburzynio).
Ale już nie drziszczym wiyncyj, niechejmy se jeszcze cosi aji na prziszły tydziyn, bo jak, Dziołszko stela, my stracymy głos, tak zaś tu bedzie jak w marnicy (kostnicy) .

Diołcho stela,
ani nie wiym, jak sie to stało, że my se prziwłaszczyli tóm strónke, jako by tu żodnego inszygo nie było. Jesi idzie ło ty zmiany, ło kierych piszesz, tak sie tykajóm wszystkigo, ni jyny moresów. Joch ni ma jeszcze taki stary, ale se pamiyntóm czasy, kiedy w naszej dziedzinie był jedyn telefón (w kancnaryji u derektora szkoły, starego Łaboja) a jedno auto, kiere mioł Lodzik Cinciała. Lodzik był muzynakt ale nie taki echtowny muzykant, bo jyny bymbnowoł na werbelku. Ringo Star z niego nie był, ale wybymbnowoł se to auto.
Nie wiym, czy znosz słowo „zahumynek”. Pochodzi łod słów „za gumnym”. Bliższe je ale czeski niż polski rzeczy. Zahumynkorze to byli drobni gazdowie, kierzi nie dali całego pola do drużstwa (spółdzielnie) albo gazdowali sami dlo sie. W czasach, jak kónie zaczyły przechodzić pumału na pyndzyj, tak tym zahumynkorzóm jeździł łorać Raszka. Mioł starego Zetora, na kiery se sóm dorobił plechowóm bude, aby mu nie padało za kragiel. Robiło sie wtedy za kust i za dziesiynć korón „na nafte”. Jak łumrził Raszka, tak po nim prziszeł na raje Urbaś. Urbaś był stary reakcyjónista i swoji usłógi rolnicze umiyjyntnie przeplatoł z propagandóm antybolszewickóm. Mioł rodzine w Polsce i dycki dowoł chlubne przikłady polski religijności. Ciekawe je, że mioł szwagra, kiery był wyuczóny za mulorza, ale ministrowoł w kościele jeszcze jako stary chłop. Potym sie ukozało, że tajnie wysztudyrowoł teologie. Jeszcze nieskorzi, jak to już było możne, tak se na prywatnej parceli jako mulorz postawił prywatnóm kaplice, w kierej celebrowoł prywatne msze jako ksióndz. Je to taki rarytas, ło drugim takim przipadku żech nie słyszoł. Jak byś chciała wiedzieć, kaj to je, tak na Osówkach, co je hned drugo dziedzina przi Czeskim Puńcowie, ale teraz już je to wszystko prziłónczóne do Trzyńca.
Już Cie ale wiyncyj nie bedym zanudzoł geograficznymi detajlami. I już kóńczym, bo przichodzo szef i muszym hned przepnyć kómputer.

Dziołcho stela,
dziynka Ci za to piekuśne pismo. Łodpowiadóm kapke nieskorzi, bo mi tyn piekielny kómputer słóżbe wypowiedzioł. Na taki czornej kastli, co sie nazywo modym, mi fórt mrugo zielóne światełko z napisym DSL. Jak żech dzwónił chłapcowi, kiery miyszko na drugim kóńcu Ełropy, tak żech sie dowiedzioł, że to światełko ni mo mrugać, jyny w kónsku świycić. "Nó dobre", pytóm sie go, "ale czymu, pieróna, nie świyci w kónsku, jyny mrugo ?" "Ja, tak to jo już nie wiym", prawi tyn mój kómputerowy ekspert. I tela. Je tak, że internet móm teraz jyny w robocie, a to już ni na dłógo, bo albo co nie widzieć pujdym do pyndzyje, albo mie jeszcze pryndzyj z roboty wyciepióm. Szak wiysz, jaki je teraz tyn świat. Niebogo mamułka dycki prawiła, że gdyby ci zasrani kómóniści nie zakazowali ludzióm chodzić do kościoła, tak by ich tu stela żodyn nie wyganioł, byliby tu do dzisio i robote by mieli wszyscy. Jo nie wiym, czy by to było aż taki dobre, bo tóm robote to by my isto mieli, to je recht, ale zaś by my chodzili z wytarganymi dupskami, bo za zarobióne pinióndze w tych sklepach by my uż ganc nic nie dostali. Ale nie puszczejmy sie raczyj do polityki, bo to smerdzi handrykowanim a zwadóm. Szak wiysz, jak sie spotkajóm dwo Polocy, hned sóm na świecie trzi partyje polityczne.
Nó, a na kóniec jeszcze tako sranda. Kupiłech moji starej szczynioka, aby miała jakisi zabawisko i nie skrywała mi ty moje papucie. Łómali my se głowe, jaki mu dać miano. Nó i stanyło na tym, że to bedzie Maks. Ale już tego wieczora syn, tyn łod kómputerów, prawi przez telefón: "Ale to ni może być Maks". "Czymu ?", pytóm sie." Na bo moja przijaciółka sie też tak nazywo, tóż by se mógła myśleć, że piskocie na nióm".
Dziołcho stela, to by już móg być tymat na dalszóm dyskusyje, móm teraz na myśli moresy młodych a gor zwiónzki partnerski na kocióm łape. Teraz tak rozmyślóm, że sie tymu po naszymu mówiło jeszcze jakosi inaczy. Na gebyno? Ni, na gebyno sie kupowało towar we sklepie. Myślym se, że niebogo mama mówiła "żyć na miarki"
Tóż Cie pieknie pozdrowióm, Dziołcho stela ze Zebrzidowic, a przi tym aji wszystkich tych, co se tóm naszóm korespóndyncyje też przeczytajóm. Do Was mówiym, nie gańbijcie sie ludziska a przidejcie sie do dyskusyje. W kupie raźnij, wiesielij a człowiek sie tela nie narobi, jak mawioł jedyn zboczyniec łod zwiónzków grupowych.

Dziołcho stela,
przesyłóm piekuśne pozdrowiynia z Czeskigo Puńcowa. Ty papucie na baterki żeś moc fajnie wymyśliła. To wygrzywani myślym. Ale jak w tych papuciach by już ta elektryka była, tak by sie jóm dało wyużyć aji inaczyj. Naprzikłod wymyśleć taki geret, że jak zapiskóm, papucie zaszczekajóm. To nima zwóli tego, że bych chcioł wymyśleć papucie dlo cyrkusanta, ale zwóli tego, że już móm skleroze i ty papuciska sie mi co chwila kansik zaszantroszóm. Już se nikiedy aji myślym, że sie tak sy mnóm szpiluje moja staro, że mi ich naschwol chowie. Bo łóna mo wielkóm radość, jak jo cosi hladóm a przi tym nadowóm. A tak - jo zapiskóm na protezie, papucie zaszczekajóm a hned wiym, kaj sóm. Nic nie muszym hladać a moja staro bedzie mieć po radości

A jak my już sóm tacy techniczni fajnszmekrzi, potym by było trzeba jeszcze wymyśleć aji klucze, kiere miałczóm a geltaszke, kiero kukuryko. Co Wy na to?