Szpacyrkym po Cieszynie
“Gdo sie za swoj jynzyk wstydzi
takim niech sie każdy brzidzi”
Dziepro nieskorzij
Kszeft “Butuś” s bótkami dlo dziecek niechali my uż po zadku i mogymy sie dzisio podziwać dalij na inksze kszefty przi ulicy Głymboki. Zaros wedla niego, kierysi rychtuje swój kszeft w kierym isto zaś cosi bydzie przedowane. Aslagi sóm tam pozalepiane papiórami, a za prawym łoknym wisi bioło kartka, kiero zaproszo nas na jego odewrzici. Jesi mogym im cosi doradzić to yno to, że trzeja by sie s tym odewrzicim pośpiychnóć, bo jak zustanie odewrzito ta nowo galeryja “STELA” to może bydóm to musieli spadki wartko zawrzić. Zaś kapke niżyj idzie trefić na kszeft ze zdrowym jedzynim na kiere dzisio je wielko moda. Czy to je taki zdrowe tego nie wiym, ale jak gdo mo pore groszy na zbyciu w szrajtofli, to może poprugować czy to jedzyni strowi. Szyldu żodnego ni majóm i nie wiym jako gdo wiy co sie tam przedowo, bo za auslagóm tych pore ditek i flaszek to przeca nima żodno informacyja. Za to kszeft dalij mo tych chwolideł aż za moc, a hrozny szyld jako moc inkszych kszeftów na Głymboki mo napisany po angielsku. Jednakowóż kierysi tam ś nich sie zlitowoł nad tustelokami i kapkem niżyj napisali po polsku, że krzefcóm bótkami i oblyczkóm. Dlo tych co ni majom chynci dźwigać łoczy do góry, to wystawili za auslagóm tela rozmajtych wiecy, kiere nóm prawióm na co tam u nich trefiymy w postrzodku.Jedno chwlidło je fest zaimawe na kierym pokozano je jakosi młodo rozkraczóno paniczka, kiero siedzi na betonowych schódkach. I jak tak człowiek zaroz nie poczyto, że sie to rozchodzi ło reklamem bótków to uwidzi nejprzód wydrzite na kolanach galaty, a dziepro nieskorzij ty bótki łod firmy Carinii.
Mini słownik: kszeft-sklep, po zadku-z tyłu, podziwać-popatrzeć, auslaga-wystawa, pośpiychnóć-przyspieszyć, spadki- z powrotem, szrajtofla-portmonetka, ditka-papierowa torebka, chwolidło-reklama, oblyczka-odzież, wiec-rzecz, zaimawe-interesujące,
Tóż miyjcie sie wszedcy dobrze i wiesiołego popióntku.
Redakcja nie ponosi odpowiedzialności za treść komentarzy pozostawionych przez internautów. Komentarz dodany przez zarejestrowanego użytkownika pojawi się na stronie natychmiast po dodaniu. Anonimowy komentarz zostanie opublikowany z opóźnieniem, po jego akceptacji przez redakcję. Komentarze niezgodne z regulaminem będą usuwane.
Dodaj komentarz