CO TYDZIYŃ PO NASZYMU: Ekologija to je dzisio modno wiec

”...wieca do łaziynek...”. fot. FJD

”...nazywajóm sie BLACK-RED-WHITE...”. fot. FJD

SZPACYRKYM PO CIESZYNIE

"Moja ty słodko cieszyńsko mowo
być zawsze do prawjynio gotowo
a jak cie uż żodyn nie bydzie rozumioł
to jyny wiater bydzie po naszymu szumioł"

Jesi gdo drziśnie

Cały tydziyń żech rosmyśloł jako przyszeł tyn marynorz na to, coby chycić sie stolarki i robić ludzióm odmaryje na obsztelunek. Możne, że kiejsi naprowde pływoł na jakimsi szyfie i jak sie łón na falach kiwoł to dwjyrze same sie we szrankach otwiyrały i klepały go po nogach. Je to tak na całym świecie, że fórt potrzeba je matkóm wynalazku i nie bydzie inakszyj. Tak czy inakszyj je to moc zaimawe tak samo jak ta ekologiczno pralnia, kiero se naszła plac w tej chałupie po ATOLU. Ludzie uż tak pogupli s tóm ekologijóm, ze dajóm se wciś wszelijakóm gupote. Jesi gdo drziśnie, że wajce bez sztympla je ekologiczne, a ze sztymplym ni, to jo sie pytóm jako poznać inkszóm ekologicznóm zielynine, kiero nima posztympowano. Bo tako pralnia elologiczno mo mieć raczyj plac na brzygu Olzy, kaj baby prały by s poza głowy kijónkami po zmazanym prodle na kamiyniu. S inkszych rozmajtych szyldów, kiere tam wiszom na ścianach idzie sie eszcze zwiedzieć, że przedujóm tam rozmajte wieca do elektryki, a kapke dalij za winklym meble kiere nazywajom sie BLACK RED WHITE. Czy ty meble bydóm pasowały do polskigo kwartyru tego nie wiym, bo u nas raczyj tyn kszeft by sie mioł mianować czorno-czyrwióno-biołe i tustelocy by wiedzieli ło co sie rozchodzi. Je to darymne, bo nie wiym wiela bych napisoł ło tych dziwokich angielskich mianach na szyldach prawie wszeckich kszeftów, to nic to nie pumoże. Całe szczynści, że chocioż wieca do łaziynek, kiere też tam w tej chałupie idzie kupić nazywjóm sie jak sie patrzi i żodyn nie bydzie mioł s tym ostudy. To uż je isto wszecko co sie tam naszło w tej modrej chałupie i za tydziyń bydym sie musioł szmatłać dalij po tej Stawowej.

Mini słownik:

coby - żeby,

odmaryje - szafy,

szyf - okręt,

szrank - komoda,

fórt - ciągle,

zaimawe - ciekawe,

drziśnie - chlapnie,

sztympel - stempel,

zmazany - brudny,

wieca - rzeczy,

kwartyr - mieszkanie,

darymne - bezsensowne,

kszeft - sklep,

ostuda - kłopot,

szmatłać - plątać

Miyjcie sie wszedcy dobrze i wiesiołego popióntku!

Dzisiejszy tekst ma tytuł "Jesi gdo drziśnie".