CO TYDZIYŃ PO NASZYMU: Robota je wszyndzi yno trzeja jóm nónś

”Je tam moc kszeftów...”. fot. FJD

”...mo mieć na zicher trzi gwiozdki”. fot. FJD

SZPACYRKYM PO CIESZYNIE

"Moja ty słodko cieszyńsko mowo
być zawsze do prawjynio gotowo
a jak cie uż żodyn nie bydzie rozumioł
to jyny wiater bydzie po naszymu szumioł"

Dwjyrze na glajzach

Dzisio nie wiym łod czego zacznóć, bo tela je tych dziwów na tej Stawowej, że rozum mi stowo. Zaros za tym stodołowym “marketym “ ło kierym żech zeszły tydziyń pisoł, je tako wielko modro chałupa co mo na wyrszczku ATOL napisane. Kiejsi downij jak szło w Polsce wszecko przedać to szyli tam rosmajtóm oblyczke dlo paniczek, a przedowali to wedla kościoła na Głymboki. S tego coch sie wywiedzioł to były to rosmajte szaty, jakle, spotki, galaty i inkszo oblyczka na kierom chynć do kupowanio miały wszecki paniczki. Chyńć sie jednakowóż skóńczyła jak kitajce zaczły ciś sie do Polski s łacnóm oblyczkóm i ATOL musioł to zawrzić. Dziynka Bogu, że jakosi sie s tego strzepli i dzisio chycili sie ważniejszej i bardziyj płatnej roboty przi stawianiu chałup. Taki dzisio mómy czasy, że jedyn dziyń kierysi stawio chałupy a jak uż tego nastawio doś, to sie przeciepuje na sprawowani autów abo możne aji na kucharzyni w gospodzie. I tymu też w tym ATOLU nadbyło izbów i przerozmajte kszefty znaszły se tam plac. Je tam jakisi kanadyjski ”Komandor”, kiery normalnie mo rzóndzić szyfami na morzu, a tu naroz chycił sie stolarki i robi odmaryje i inksze szranki, kiere pasujóm do rosmajtych dziur we ścianach. Taki to je szprytne, bo nie trzeja dejmy na to w szafie bocznych futer, powały i dłaszki yno jakisikej dwjyrze na glajzach i to sie ludzióm podobo. Ku tymu je tam ukozany na takim wielkim chwolidle szykowny panoczek obleczóny za marynorza, ale czy to je akurat komandor to bych sie spiyroł, bo na czopce nimo żodnych gwiozdek, a mo mieć na zicher trzi. Przi nim kierysi dopisoł “stop podróbkom” i nie wiym czy sie rozchodzi ło tego chłopa czy idzie ło ty szranki i odmaryje.

Mini słownik:

oblyczka - coś do ubrania,

chycili sie - zabrali się,

przeciepuje - przerzuca,

szyfy - okręty,

obleczóny - ubrany,

przedowali - sprzedawali,

wedla - obok,

odmaryja - szafa,

szrank - kredens,

szaty - sukienki,

jakle - kurtki,

spodki - spódnice,

ciś sie - pchać się,

zawrzić - zamknąć,

stawianiu - budowaniu,

glajzy - szyny.

Miyjcie sie wszedcy dobrze i wiesiołego popióntku!

Dzisiejszy tekst ma tytuł "Dwjyrze na glajzach".