CO TYDZIYŃ PO NASZYMU: Drzymy do przodku

Nie wiym czy gdo eszcze pamiynto, jaki kiejsi landauery jeździły po cestach naszego miasta, ale na zicher nie było takich jak żech zeszły tydziyń zoczył w Cieszynie pod wiaduktym. Tak sie tymu dziwóm i prziszło mi do czepani, że skoro nasze cesty lepszyj nie wyglóndajóm, to nie worce na nich puszczać porzóndnych aucisków. Szkoda yno, że łone sóm do wożynio ludzi i żodyn tego nie kóntroluje. Przeca na cestach je dycki pełno policmajstrów i ni ma możne, coby tego nie widzieli. Możne, że nie widzóm, bo chytajóm yno tych co wartko gzujóm, a przeca taki hobo nie poradzi sie dobrze rozegnać, bo samo ledwo jedzie, a ku tymu musi co chwiliczkem stanóć, coby ludzie ś niego wylyźli. I jak tak dalij pudzie, to isto przestanie to dziepro po cestach jeździć jak sie samo na ceście rozkraczy i uż bydzie po radości. Gorsze jak nieskorzij ci ludzie dostanóm sie do chałupy, jak bydzie dejmy na to na polu cima, abo bydóm na ceście zomiynty. To isto żodnego nie zaimo do czasu aż sie to rozkraczy, bo nejważniejszy je przeca pinióndz, kiery trefi do kapsy. Taki je s tym dzisio misz masz, że ani nie wiadómo do jakigo tego landauera siadać, bo każdy mo inszóm farbe. Cało tyncza sie tu u nas zarachowała i yno dziynka tymu, że co chwile na tym banhofie, kierysi przez megafón ludzióm cosi do uszy siczy, to poradzóm siednóć do kierego trzeja. Na tym banhofie sie potkały dwa światy, jedyn taki nowoczesny, a drugi przedpotopowy, ale podarziło sie ich przeca jakosi razym do kupy poskłodać. Myślym se, że my to je taki naród, co wszecko poradzi wyszpekulyrować i dycki jakosi pomaliczku, ale fórt drzymy do przodku.

Mini słownik: landauer - stary powóz, cesta - droga, na zcher - na pewno, dziwóm sie - patrzę się, czepań - głowa, nie worce - nie warto, dycki - wciąż, policmajster - policjant, gzujóm - pędzą, nieskorzij - później, zomiynt - zaspa, kapsa - kieszeń, farba - kolor, fórt - stale, banhof - dworzec.

Tóż miyjce sie wszedcy dobrze i wiesiołego popióntku