CO TYDZIYŃ PO NASZYMU: Kiejsi my na kołach jeźdzli, a dzisio chłapcy na nich hópkajóm

”...rozmajte hoba..”

Dwa dni nie było kaj sie ruszyć, bo jacysi chłapcy i dziełuchy skóńsi tam s Polski, przismyczyli do Cieszyna swoji koła, coby se na nich poskokać. Bo dzisio to uż sie nie do normalnie jechać na kole, coby kansi dojechać. Trzeja postawić skocznie i wybić sie do luftu, a przi tym eszcze tak wykróncać wolantym, coby wszedcy sie na niego dziwali. Kiejsi jak ludzie jeździli na kołach do roboty, to dowali se pozór, coby do żodnej dziury na ceście nie wpaś, a dzisio to naswol stawiajóm taki rozmajte hoba, coby ich przeskakować. A przi tym to je roz dwa cosi se złómać i znónś sie wartko we szpitolu. Jedni to aji nazywajóm szportym, kiery mo ludzióm dować jakómsi uciechem, kierej jo wubec nie wszymóm. To uż lepszyj zajechać se do Malinki i podziwać sie na tych co hópkajóm na prowdziwnej skoczni, bo trwo to delij i widać tego szportowca do samego kóńca. Czasami aji fajne widać, jak sie taki szportowiec obali i drze swojim zadkym po igelicie. Na tych szpecyjalnie przirychtowanych kołach do tego skokanio, idzie sie rychlij wywalić, ale coby to uwidzieć to trzeja zaroz stoć wedla tej skoczni, zbitej s drzewianych desek. Przidzie isto kiejsi taki czas, że chłapcy i dziełuchy zacznóm hópkać na tych kołach na prowdziwej skoczni w Malince, abo aji w Zakopanym. Tak rozmyślóm wiela to eszcze rozmajtych dziwokich szportów ludzie wymyślóm, coby yno cosi s tym swojim nadbytnim czasym zrobić. Bo to je dycki tak, jak ludzie ni majóm prowdziwnej roboty, to dziwoczóm ze sobóm, a inksze guptoki za to dziwani sie na nich eszcze im płacóm.

Mini słownik: przismyczyć-przyciągnąć, koło –rower, kansi-gdzieś, luft-powietrze, wolant-kierownica, dziwali sie-patrzyli, cesta-droga, hobo-grat, wartko-szybko, naswol-na umyślnie, nie wszymóm-nie rozumiem, wedla-obok, hópkać-skakać, dziwoki-śmieszny, dycki-zawsze, nadbytni-zbyteczny.

Tóż miyjcie sie wszedcy dobrze i wiesiołego popióntku.