CO TYDZIYŃ PO NASZYMU: Co by nas było moc to figlowani je przidajnóm rzeczóm

"Kónsek wyżyj je kszeft dlo elektykorzi...". fot. FJD

"...te tradycyje chcóm letnikorzóm ukozać właściciele EUROSPARU...". fot. FJD

SZPACYRKYM PO CIESZYNIE

"Moja ty słodko cieszyńsko mowo
być zawsze do prawjynio gotowo
a jak cie uż żodyn nie bydzie rozumioł
to jyny wiater bydzie po naszymu szumioł"

POZÓR! Kiery nimo chynci tego czytać, abo kansi wraził łokulory, abo mo moc roboty i łoczy go bolóm to se może tego posłóchać jak prziciśnie ”kursywom” na tóm czornóm szczałke w tej szarej kostce, kierom nóndzie zaroz pod spodkym.

Społym figlowali

Zeszły tydziyń chybiło mi placu na napisani ło tych trzóch chwolidłach, kiere wiszóm na płocie prociw tego skryntu ku Goleszowu. Je tam też cało literatura a ku tymu wymyślóne we słowach rozmajte kumedyje, kiere ciynżko je wykapować ło co rzecz sie rozchodzi. Bo dejmy na to, kiery wiy co to je “FIGLOPARK” i ku czumu to przirazić. Jo kiejsi słyszoł, że u nas downij mówiło sie, że dziełuchy s chłapcami społym figlowali i dziynka tymu je nas dzisio tela w Cieszynie. Możne, że te tradycyje chcóm letnikorzóm ukozać właściciele EUROSPARU i na tym cosi eszcze utarżyć. S drugigo chwolidła dowiymy sie, że majóm włośnego piekorza, włośny wyndzok a przi tym sami aji piekóm wiesielowe kołoczyczki. Coby jednakowóż żodyn nie plóntoł sie tam kaj ich nima wyoślili to na inszym szyldzie że trzeja ich chladać w jakimsi PARKU HANDLOWYM. A to trzeci chwolidło posyło nas kansi aże do Skoczowa po tepichy i linoleła, kierymi mogymy se przikryć deliny. Nie wiym czy to wszecko idzie tak wartko poczytać jak sie autym jedzie, ale możne, że jak dziynnie spamiyntómy chocioż jednóm literem to za sztwierć roku zachycymy kaj mogymy nasze pinióndze udać. Kónsek wyżyj je kszeft dlo elektrykorzi, kierzi ptrzebujóm kupić kapkem wiyncyj drótu, sztekrów, szaltrów, zicherunków i inkszywch wieców przidajnych do zakłodanio sztrómu w nowych chałupach. Kiejsi eszcze możne przed dziesiyńcióma rokami tam przedowali i sprawowali rozmajte FIATY, ale isto tyn kszteft ni mioł wziyńcio i musieli to zawrzić. Cieszyn ni mo jakosi szczynścio dlo firmowych autowych salónów, bo kiejsi był u nas taki wielki kszeft Daewoo, a niedowno aji Renault, ale pozawiyrali swoji intresy i teraz trzeja s każdym autym na gwarancyji gnać ku Biylsku.

Mini słownik:

chybiło - zabrakło,

chwolidło - reklama,

prociw - na przeciw,

przirazić - dołączyć,

kiejsi - kiedyś,

społym - razem,

letnikorz - turysta,

kaj - gdzie,

kansi - gdzieś,

tepich - dywan,

włośny - własny,

wyndzok - wędzarnia,

chladać - szukać,

deliny - podłoga,

elektrykorz - elektryk,

szteker - gniazdko,

szalter - wyłącznik,

zicherunk - bezpiecznik,

pozawiyrali - pozamykali.

Miyjcie sie wszedcy dobrze i wiesiołego popióntku!

Dzisiejszy tekst ma tytuł "Społym figlowali".