CO TYDZIYŃ PO NASZYMU: Jak siedzyny za wolantym to papióry je dobrze mieć papióry przi siebie

”...rozmajte chwolidła...”. fot. FJD

”...reklamujóm cosi bliżyj...”. fot. FJD

SZPACYRKYM PO CIESZYNIE

"Moja ty słodko cieszyńsko mowo
być zawsze do prawjynio gotowo
a jak cie uż żodyn nie bydzie rozumioł
to jyny wiater bydzie po naszymu szumioł"

POZÓR! Kiery nimo chynci tego czytać, abo kansi wraził łokulory, abo mo moc roboty i łoczy go bolóm to se może tego posłóchać jak prziciśnie ”kursywom” na tóm czornóm szczałke w tej szarej kostce, kierom nóndzie zaroz pod spodkym.

Niechać stówke

Zaś jak każdego roku uż fest ubyło nóm dnia i trzeja sie dzisio śpiychać, coby za widoka to wszecko obynś co móm w planie. Zwyrtnym sie dzisio kole tego kszeftu co bynzine przedowo i pujdym cestom ku Skoczowu. Zaroz za nim je warsztat kaj połoglóndajóm wóm auto i dajóm w rejestracyji sztympel, kiery sie przido jak was zastawi jakisi policaj i bydzie s wami nagrowoł. Majóm tam wszelijaki wercojgi, kierymi poradzom sie dostać sie do każdego kóntka we waszym aucie a przi tym też powiedzóm czy auto dobrze świyci i czy nie bydzie hópkało po ceście. Ni ma to za darmo i każdego roku trzeja tam u nich niechać stówke, bo inakszyj bydymy jeździć s duszóm na ramiyniu. Rozchodzi sie ło to, że jak was chycóm policajty to zbierom rejestracyje a przy tym dowalóm aji pokute i dopiszóm jakisikej punkty. Raczyj dobrze je wiedzieć kaj tyn warsztat je, coby nie robić se łostudy i bez strachu cały rok siedzieć za wolantym. Za nimi je skrynt na Goleszów, kiery obsiadły tak jak wszyndzi w Cieszynie rozmajte chwolidła. Idzie sie ś nich dowiedzieć aji tego,że za dwacet i pół kilometra je jakisikej hotel “Stok” we Wiśle. Dlo mie je to ganc dziwoki napad, bo przeca jak gdo ujedzie tych dwacet kilometrów to na iste zapomni jakóm to maluśkóm przikryncónóm na rułce tabulke uwidzioł. Z drugi strony cesty sóm trzi wielki chwolidła, ale jedno też mo na sobie reklame, kiero chce nas zakludzić do jakigosi serwisu aże we Skoczowie. Zaś ty dwa drugi uż reklamujóm cosi bliżyj jesi uznómy, że Bażanowice to je dziedzina tak blisko Cieszyna, że poradzymy tam dochynóć aji kamiyniym. Po drugi stronie cesty też wiszóm trzi chwolidła, ale ło nich napiszym za tydziyń.

Mini słownik:

fest - mocno,

śpiychać - śpieszyć,

zwryrtóć - obrócić,

kszeft - interes,

kaj - gdzie,

policaj - policjant,

nagrowoł - dokuczał,

wercojg - narzędzia,

poradzóm - potrafią,

hópkało - podskakiwało,

łostuda - kłopot,

wolant - kierownica,

pokuta - kara,

skrynt - zakręt,

chwolidło - reklama,

dziwoki - śmieszny,

cesta - droga,

zakludzić - zaprowadzić,

dziedzina - wieś,

dochynó - dorzucić.

Miyjcie sie wszedcy dobrze i wiesiołego popióntku!

Dzisiejszy tekst ma tytuł "Niechać stówke".