Przi niedzieliczce, coby nie zapomnieć naszej rzeczy: Pudliczka i kiśniczki

”...Tupperware o kierych żech eszcze nie słyszoł...". fot. FJD

"...dalij sóm fachmani łod miysznio...". fot. FJD

SZPACYRKYM PO CIESZYNIE

"Moja ty słodko cieszyńsko mowo
być zawsze do prawjynio gotowo
a jak cie uż żodyn nie bydzie rozumioł
to jyny wiater bydzie po naszymu szumioł"

Pudliczka i kiśniczki

Dzisio sprugujymy szmatłać sie dalij staróm cestóm ku Skoczowu. Po chodniku jednakowóż muszymy stanóć przi downym motelu i tankszteli, kiero mo uż isto dziesiónte miano. Kiejsi szło se tam legnóć na strużoku i głowe zeprzić na zogłówku, a dzisio na spdku tam sóm same kszefty, a na wyrchu yno biura. Zacznymy łod prawej stróny dziwać sie na to co tam je. Piyrsze sóm jakisikej “Tupperware” ło kierych żech eszcze nie słyszoł, ale pochledołech w komputrze i uż wiym, że kszefcóm rozmajtymi wiecami przidajnymi w kuchyni. Nejwiyncyj jednakowóż wyrobiajom wszelijakich plastikowych kiśniczek s deklami a przi tym aji gorki, talyrze, flaszki i inksze plastikowe wieca. Ze szyldu sie jednakowóż nic nie dowiymy, bo łóni se isto rozmyślajóm, że każdy mo jejich firme znać. Możne, że paniczki wiedzóm co to sóm za jedni i że ty pudliczka i kiśniczki kiere wyrobiajóm sóm do czegosi w kuchyni przidajne. Zaś jedny dwiyrze dalij sóm fachmani łod miyszanio jako to majóm na szldzie napisane-farb i tynków, ale gdo do nich s miasta przidzie i ich tam nóndzie tego wubec nie wiym. Dwiyrze dalij przedujóm yno same dwiyrka do mebli jaki uż mómy w kuchyni, abo możne też kupujóm to stolorze, kierym sie nie chce nowych mustrów robić. Za winklym trefiymy zaś na jakisi studio, kiere możne kiejsi było biurym, ale ta moda na nowoczesne miana też im sie isto ciepła na łoczy i sie na studio przechrzcili. Coby im nie było luto żech nie napisoł co łóni w tym studiu robióm to powiym, że rozchodzi sie ło radzyni nóm kaj se postawic dóma szrank, odmaryje, błeszok i możne aji sztokerliki. Myślym se, że ku tymu poradzóm nóm, na jaki farby posztrajchować se wszecki ściany we kwartyrze.

Mini słownik:

szmatłać sie - luźno spacerować,

cesta-droga,

po chodniku - po drodze,

kszeft - sklep,

dziwać sie - patrzeć,

pochledać - poszukać,

kiśniczka - pudełko,

wieca - rzeczy/przedmioty,

przidajne - przydatne,

nóndzie - znajdzie,

dwiyrka - drzwiczki,

muster - wzór,

winkiel - narożnik,

szrank - komoda,

odmaryja - szafa,

błeszok - łóżko,

sztrajchować - malować.

Tóż mjyjcie sie wszedcy dobrze i wiesiołej niedzieliczki.

Dzisiejszy tekst ma tytuł "Zaroz we winklu".