CO TYDZIYN PO NASZYMU: Kiery wiy co to je charmynzi to iste też wiy co to je ździorbo

Zdjęcia F.J. Dral

POZÓR! Kiery nimo chynci tego czytać, abo kansi wraził łokulory, abo mo moc roboty i łoczy go bolóm to se może tego posłóchać jak prziciśnie ”kursywom” na tóm czornóm szczałke w tej szarej kostce, kierom nóndzie zaroz pod spodkym.

Zeszły tydziyń żech przepómniół napisać, że tyn bar s piwym na Banotówce, mało że je poszkryfany od ziymi aż po dach,to aji naopkoło. Łokna sie jakosi obstoły, ale ta brónotno farba na nich nie prawi nóm w kierym miejscu łóne sóm. Zaś s drugi stróny na tym słómianym płocie przirażóne je chwolidło łod kszeftu, na kierym pies i kocur majóm isto napranych chłopów naganiać do niego.Tak czy inakszyj dómowe zwiyrze, kiere plyncie sie po cestach nie pasuje do kszeftu zoologicznego. Atrakcyjóm raczyj były by słónie, żyrafy i krokodyle abo eszcze inksze azjatycki i afrykański stworzynia. Kapke dalij idzie łoko zawiesić na pieknej chałupce, kiero nie pasuje do tych kostkatych bloków, abo na opak. Je łóna postawióno na szkarpie, kiero isto sie ruszo i widać, że jedo ściana uż mu tam prasko. Na prociw po drugi strónie cesty stojóm trzi plastikowe zwóny, a każdy mo inszóm farbe, bo isto je to dlo tych co uż przepómnieli liter i nie poradzóm poczytać co do kierego zwóna sie patrzi. Srandowne je yno to, że ty dziury przez kiere sie to rozmajte charmynzi do postrzodka wciepuje sóm taki małe, że jak przidzie co wiynkszego to ludzie stawiają to wedla. Kapke dalij idzie uwidzieć dwie brónatne budki w kierych jedyn kszefci chlebym, rożkami i żymłami,a drugi przeduje kwiotka. Na tej piyrszej w łoknie je na szkryfane krejdóm, że jak se zawinszujecie to chlyb porzazajóm wóm na skibki,a rychlij upiekom wóm to co mocie radzi.Ta budka co kszefci kwiotkami nic nie zachwolo,bo łóni isto wiedzóm, że chłopi na miano i na urodziny swojim paniczkóm i tak kupujóm nejtańsze.

Mini słownik:

poszkryfany-pobazgrany,
przirażóne-przytwierdzóne,
chwolidło-reklama,
cesta-droga,
kapke-trochę,
prasko-pęka,
srandowne-śmieszne,
charmynzi-odpady,
wciepuje-wrzuca,
wedla-obok,
kszefci-handluje,
żymła-bułka,
porzazane-przekrojone,
paniczka-żona.

Tóż miyjcie sie wszedcy dobrze i wiesiołego poipióntku.

Dzisiejszy tekst ma tytuł "Plyncie sie po cestach"