CO TYDZIEŃ PO NASZYMU: Poprawiani gzychtu to je feler wszeckich paniczek

"...poszkryfano szprajym bronatno szopka...", fot. FJD

"...mianuje sie "Ciuszkowo", fot. FJD

SZPACYRKYM PO CIESZYNIE

"Moja ty słodko cieszyńsko mowo
być zawsze do prawjynio gotowo
a jak cie uż żodyn nie bydzie rozumioł
to jyny wiater bydzie po naszymu szumioł"

POZÓR! Kiery nimo chynci tego czytać, abo kansi wraził łokulory, abo mo moc roboty i łoczy go bolóm to se może tego posłóchać jak prziciśnie ”kursywom” na tóm czornóm szczałke w tej szarej kostce, kierom nóndzie zaroz pod spodkym.

Je rozpostrzóny

Coby sie wszedcy skapowali kaj my sóm,to trzeja napisać,że to je fórt Banotówka.Kaj sie jednakowóż podziwómy to widać pieknie opucowane chałupy s Cieszynianki.W niekierych chałupach nima kwartyrów,bo hańdownij jak to stawiali snaszli sie tacy ludzie kierzi rozmyślali kapke do przodku.To rozmyślani podarziło sie w tych chałupach w kierych sóm dzisio rozmajte kszefty,a w jednej ś nich je aji plac,coby ludzie mieli kaj ze sobóm pofulać.Każdy s tych kszeftów jakosi sie przeca nazywo,a fantazyji na szyldach je tak moc,że chruza bije.Tyn piyrszy w kierym poprawiajom paniczkóm urodem nazywo sie "Imbir" i możne,że korzyniami tej azjatycki zielyniny szmyrajóm paniczkóm po licach,coby łodmłodniały.Możne,że też to dropani sie do nich na piyrsze piyntro je wrachowane w wartkóm przemianem materii,kiero w każdym człowieku je po plómpaniu krwie nejważniejszo.Tak czy inakszyj może worce tam do nich wlyś skyrs tego,coby sie dowiedzieć jako sie pozbyć piniyndzy,a dóma w zdrzadle widzieć fórt tóm samóm pomarszczónóm gymbe.Tyn przełogrómnej urody szyld je rozpotrzóny tak wysoko na scianie,żech sie tak na niego zadziwoł i przepómniłech napisać ło tej poszkryfanej szprajym bronatnej szopce do kierej ludzie snoszajóm rozmajty maraz i charmynzi.Po drugi stronie cesty stoji tako bioło niewielko chałupka w kierej gdosi kszefci zagranicznóm staróm oblyczkóm i mianuje sie "Ciuszkowo".Przed dwiyrzami idzie uwidzieć wbity kulik na kiery jak na manekinie naździote je jakisikej straszydło,kiere mo isto naganiać ludzi,kierzi majóm łostako groszy w kapsie.

Mini słownik:

kaj - gdzie
fórt - ciągle
podziwómy - popatrzymy
opucowane - otynkowane
kwartyr - mieszkanie
stawiali - budowali
kapke - troszkę
pofulać - pogadać
szymrać - pocierać
wartki - szybki
plómpani - pompowanie
rozpostrzóny - rozpostarty
maraz - brudy
charmynzi - odpady/galęzie
kulik - drążek
naździote - nanizane
gzycht - twarz

Miyjcie sie wszedcy dobrze i wiesiołego popióntku!

Dzisiejszy tekst ma tytuł "Je rozpostrzóny"