CO TYDZIEŃ PO NASZYMU: Krygle s piwym

Zdjęcia F.J. Dral

POZÓR! Kiery nimo chynci tego czytać, abo kansi wraził łokulory, abo mo moc roboty i łoczy go bolóm to se może tego posłóchać jak prziciśnie ”kursywom” na tóm czornóm szczałke w tej szarej kostce, kierom nóndzie zaroz pod spodkym.

Gdo nie czyto co tydziyń tego "Szpacyrku po Cieszynie" to nie wiy kaj my dzisio sóm.Bo czasym mogymy mieć s tym moc starości jak szpacyrujymy po nowych osiedlach.Kiejsi każdo chałupa była inkszo i jak sie łoczy dzwigło do wyrchu to zarozinko wiedziało sie kaj sie je.Dzisio wszecki chałupy sóm jednaki i jak człowiek nie napisze kaj my sóm to może być s tym ostuda.Łostatnio aji naszo SM Cieszynianka zaczła stawiać wedla chałup taki same zielóne hasioki i jak kiery uż mo kłopoty s pamiyńcióm to nie wiy kaj sie tym padym snaszeł i czy wyciepuje maras we swojim rejónie.Nie idzie sie aji smiarkować po słupach na kierych wiszóm lampy,bo każdy je oblepióny jednakimi reklamami.A wiszóm tam aji czasym porem miesiyńcy i tustelocy na zicher nie wiedzóm przi kierej lampie tak naprowde sie zadzierżeli.Nejwiyncyj tych papiórzanych chwolideł patrzi sie na pojczowani piniyndzy i na kupowani starych aucisków.Piekne to nima i szpeci wszecko dookoła.Żodyn też tego nie czyto,ale też żodyn tego nie skludzo,a stykło by jyno ,coby miastowi wachtyrze kozali to skludzić tym,co to tam poprzilepialii.Zdo sie,że byłoby to ganc ańfachowe,bo na każdym papiórku je nomer telefónu.Stykło by jyny zazwónić na nomer tego miglanca co nas pyto,coby u niego se pojczać pinióndze. Po drugi strónie cesty stoji parterowo chałupa poszkryfano łod ziymi aż po dach takim teraz modernym graffiti i chybiło placu na szyld s kierego szło by wyczytać ło co sie rozchodzi.Wedla dwiyrzi na płocie zapostrzónym słómóm idzie uwidzieć obrozek na kierym stoji dwóch chłopów,a w gorsciach dzierżóm krygle s piwym.

Mini słownik:

kaj-gdzie,
ostuda-kłopot,
kiejsi-kiedyś,
inkszo-inna,
starość-zmartwienie,
hasiok-śmietnik,
wyciepać-wyrzucić,
na zicher-na pewno,
pojczowani-pożyczanie,
skludzo-sprząta,
ańfachowe-proste,
cesta-droga,
poszkryfano-pobazgrana,
zapostrzóne-zasłonięte,
krygiel-kufel.

Tóż miyjcie sie wszedcy dobrze i wiesiołego poipióntku.

Dzisiejszy tekst ma tytuł "Krygle s piwym"