CO TYDZIYŃ PO NASZYMU: Przekrymbiało wiec, wartko dycki sie rosuje ”...fest zar-zowiało...” być zawsze do prawjynio gotowo a jak cie uż żodyn nie bydzie rozumioł to jyny wiater bydzie po naszymu szumioł" Dycki cosi worce napisać ło wiecach kiere tustelokóm robióm łostude, bo czasym możne kierysi sie skapnie, coby to zrychtować. Dwa tydnie tymu napisołech ło takim szurym przekrymbiałym słupie na Hażlaski, do kierego przirażóne były rozmajte dróty. I podziwejcie sie ludzie, yno minyło dwa tydnie, coby prziszło jakisi smiłowani, bo wstyrczył tam gdosi nowy słup, kiery eszcze prziszrubowoł zieleźnóm ganc nowóm objymóm. Je to do podziwu, ale isto tyn gdosi fest sie wylynkoł i wziył se to do sumiynio, coby tyn szury przekrymbiały słup kómósi nie zgruszoł na czepóń. Gorzij jednakowóż majóm sie ty wieca, kiere sóm yno zar-zowiałe i eszcze im daleko do obalynio sie na kogosi. Tak to je dzisio s naszóm Studnióm Trzóch Braci, kiero je w postrzodku fest zar-zowiało, że uż aji letnikorze przestali sie przi ni focić. I nie wiym wiela razy eszcze przidzie mi ło ni pisać, coby kierysi nad nióm sie slitowoł. Wedla Cieszyna mómy werk kiery eszcze ni ma zawrzity i sie mi zdo, że do dzisia fórt wyrobio rozmajte farby, kierych by isto na posztrajchowani tej studni nie chybiło. Dwa tydnie tymu w Dómie Narodowym szło se kupić rozmajte stare ździorbia, kiere tuselocy tam przismyczyli, coby prugować nachósować inszych do ich kupiynio. Ni ma do nigdy taki leki, bo sóm to dycki wieca, kiere mało gdo potrzebuje. A jak uż ich kupi, to mo ś nimi yno ostude, bo proch kiery góni w lufcie mo fest rod se na nich dycki siednóć. Nieskorzij skyrs tego, paniczki dziynnie muszóm drepsić kolem tego i fórt to uciyrać s tego prochu, a przeca w kuchyni majóm moc inszej roboty, kiero na nich czako. Mini sównik: worce-warto, łostuda-kłopot, skapnie-zorientuje, zrychtować-naprawić, szury-krzywy, przekrymbiały- spróchniały, przirażóne- przytwierdzone, wstyrczył- włożył, zgruszoł- upadł, czepóń- głowa, wieca-rzeczy, letnikorz-turysta, focić- fotografować, fórt-ciągle, wedla-obok, werk-zakład, chybiło-zabrakło, żdziorba-graty, posztrajchowani-pomalowanie, dycki-wciąż, nachósować - ostuda-kłopot, luft-powietrze, dycki-wciąż, drepsić-dreptać. Tóż miyjcie sie wszedcy dobrze i wiesiołego popióntku
|
reklama
|
|||||||||||||||
|
Dodaj komentarz