CO TYDZIYŃ PO NASZYMU: Dycki se spominómy na czasy, jak bylimy dzieckami, bo żylimy bez żodnej starosci

Ło pogodzie idzie cosi dycki napisać, a eszcze latoś jak łóna je tak dokuczliwo to sie sama ło to pyto. Tustelocy majóm ostude s oblyczkom, bo co porem godzin je inakszyj. Roz padze po drugi wiater ducho, a po trzeci tak przigrzywo, że trzeja wartko jakle ściepować. Przeziómbnóć idzie przeca wartko, a nieskorzij to uż je yno prosto cesta do błeszoka. Wszedcy prawióm, że kiejsi tak nie było, bo jak miało być zima to tak na zicher było, a jak sie zamroczyło to na zicher nieskorzij padało. Mie sie zdo, że to narzykani sie biere s tego, że jak my byli dzieckami, to nóm to było jedno jako je pogoda i dzisio uż nic nie pamiyntómy. Tak rozmyślóm co człowiek lepszyj i delij pamiynto, czy to jak nóm kierysi zóndzie za skórem, czy to jak gdosi zdarma w czymsi nóm pumoże. Sie mi zdo, że delij spominómy se na dokuczliwe wieca, a wartko ulatuje nóm s czepani to, co kierysi nóm doł zdarma. A teraz kapke ło inszych wiecach, bo ni ma dnia coby sie cosi w Cieszynie zaimawego nie przitrefiło. Dejmy na to zeszły tydziyń w Oranżyryji Cieszyńskigo Zamku móglimy se obezdrzić jako tustelocy żyli sztyrecet roków tymu. Może to je dobre pokazować dzisio dzieckóm jako my kiejsi żyli, a jakosi łóni dzisio majóm sie dobrze i dobrze by też było, coby se tóm dobroć wożyli. Moc tam było ludzi, kierzi tych czasów nie pamiyntajóm i było widać jak wybauszajóm łoczy na wystawióne “kartki” za kiere szło kupić miynso, mlyko i insze wieca. S jednej stróny było to przikre, że człowiek nie poradzioł se kupić tego na co mioł szmak, a drugi stróny do hasioków nie było wyciepowane żodne jedzyni, a na cestach nie było widać żodnych hrubych ludzi.

Mini słownik: dycki-ciągle, ostuda-kłopot, oblyczka-ubranie, ducho-dmucha, jakla-kurtka, ściepować- zrzucać, nieskorzij-później, cesta-droga, na zicher-na pewno, delij-dłużej, wieca-rzeczy, czepań- głowa, gdosi-ktoś, kapke-trochę, wożyli-szanowali, hasiok-śmietnik.

Tóz miyjciie sie wszedcy dobrze i wiesiołego popióntku