CO TYDZIYŃ PO NASZYMU: Za moc hałdamaszy to też ni ma dobre ”...prziszło porem ludzi...” być zawsze do prawjynio gotowo a jak cie uż żodyn nie bydzie rozumioł to jyny wiater bydzie po naszymu szumioł" W sobotem w Cieszynie skóńczył sie na rynku hałdamasz i wszecko ucichło. Wszedcy kszewciorze też kansi sie potracili i zustoł yno na widoku obświnióny patrón naszych fajermónów. Sztwortego maja było jejich świynto, ale żodnymu nie prziszło do czepani, coby tego obesranego przez gołymbie Floriana chocioż kapke opucować. Coby sie jednakowóż tak nie ciepoł na łoczy, to zustoł ogrodzóny takimi biołymi huśtaczkami, na kierych poradzi se siednóć aji cało familija.Tela było tych hałdamaszy zeszły tydziyń, że nie idzie nic takigo wybrać, coby było srandowne i zustało tustelokóm w pamiyńci. Niepodarzóne naprowde było to śpiywani europejskigo hymnu w połednie piyrszego maja. Mioł być pełny rynek, a prziszło porem ludzi, kierzi eszcze ani bardzo nie wiedzieli co sie śpiywo. Je to gańba na nasze miasto, że mało gdo poradzi zaśpiywać nejważniejszóm europejskóm pieśniczke. Ale za to po Europie chcieliby rajzować wszedcy, bo uż to tak wlazło ludzióm w krew, że prawióm, że sie im to patrzi. Coroz mjynij je tych tusteloków co se spóminajóm jako to było kiejsi na granicy w Cieszynie. Każdy był obmacany, coby zebrać mu to, co se kupił w Czachach. Nikierym to nie zbiyrali i kazowali sie s tym wrócić spadki, abo kansi wyciepać. Spadki taki jedzyni żodyn kszeft by przeca nie wziył i moc razy trzeja było to za mostym weprać do swojigo bachórza. Znóm eszcze dzisio takich co zusali wrócóni s pomarańczkami i zawinaczami, a nieskorzij musieli to za mostym weprać do siebie. Co sie potym w jejich bachórzach robiło i wiela razy gónili do haźla to lepszyj uż tego dzisio nie spóminać. Mini słownik: hałdamasz-zabawa, kszefciorze-handlarze, fajmón-strażak, ciepoł-rzucał, czepań-głowa, kapke-trochę, familija-rodzina, srandowne –śmieszne, niepodarzóne-nieudane, gańba-wstyd, rajzować-podróżować, prawióm-mówią, spadki- z powrotem, kszeft-sklep, zawinacze-rolmopsy, bachórz-brzuch, weprać-wrzucić, haziel-toaleta. Tóż miyjcie sie wszedcy dobrze i wiesiołego popióntku
|
reklama
|
|||||||||||||||
|
Dodaj komentarz