CO TYDZIYŃ PO NASZYMU

”...postawić mały banhof...”

Ze trzi, abo ze sztyry tydnie tymu pisołech ło taki nowince parkowanio swojich aucisków na placu wedla Leory Merlin. Rozchodziło sie ło to, że zustali tam najyńci dwo szykowni chłopi, kierzi każdymu co na tyn plac chcioł sie wtarabanić ze swojim auciskym wstyrkowali do rynki jakisi kartki. Na nich było wyłóślóne, że poradzymy tam stoć s darma yno dwie godziny. Dzisio przi taki automatyzacyji, to aż dziw biere, że nie postawili tam jakisi zieleźnej kiśni, kiero by ty kartki ludzióm do rynki wstyrkowała. Szło to przeca tak zrobić, jak dejmy na to je to za Gliwicami na tej szyroki ceście, kiero mo sztyry pasy przegrodzone zieleźnym płotym. Cosi sie jednakowóż pomiyniało, bo łóni uż tam dziynnie nie stojóm, isto skyrs tego, coby nie dostać w nogach żylaków. Nowość dzisio je tako, że yno ci dwo chłopi drepszóm kolem waszych aucisków we strzody, pióntki i soboty, a w inksze dnie isto se spoczywajóm i moczóm nogi we słónej wodzie. Dlo tusteloków je to nowinka, że coby nie być tam przeganianym, lepszyj udać tam swoji pinióndze w pyndziałek abo we czwortek. Moc cieszynioków ni może też prziś na to, skyrs czymu tyn czeski cug na kierego czesi prawióm vlak, dziynnie telkowne razy robi nóm ostude. Skyrs niego rampy na Zamkowej sóm fórt zawrzite i auta s łobu stron muszóm godzinami stoć przed sztrekóm. Przeca szło by tyn cug zastawić uż na ulice Dojazdowej na kierej trzeja postawić mały banhof i kierzi do Cieszyna przijadóm tam by ś niego wylazowali, a ci co chcóm odjechać to też do tego cugu tam by wlazowali i nie byłoby s tym żodnej ostudy.

Mini słownik:
tydnie-tygodnie,
wedla-obok,
kierzi-którzy,
wstyrkować-wpychać,
wyłoślóne-wytłumaczone,
zieleźne-żelazne,
kiśnia-skrzynia,
skyrs-z powodu,
cesta-droga,
drepsić- spacerować,
strzoda-środa,
zawrzite-zamknięte,
sztreka-tory,
cug-pociąg,
banhof-dworzec,
wlazować-wchodzić

Tóż mjycie sie wszedcy dobrze i wiesiołego popióntku