CO TYDZIYŃ PO NASZYMU: Wciepać na ruszta faszyrke
Przeca w pyndziałek dwi a dwacatego kapke śniega nasuło i możne, że dziecka wysmyczóm skije i sónki, coby sie pospuszczać na Cieślarówce. Dłógo tego bydzie, to isto żodyn nie wiy, bo łostatni roki s tóm zimóm u nas je doś bolawie. Dziynka tymu szpacyrowani po Cieszynie pudzie mi snadno i je nadzieja, że nie uklejznym ani nie kopyrtnym. Dzisio stojymy na Mynniczej przed chałupóm s nomerym osim a sztyrycet na kierej je szyldowy miszung. Łostatnio była rzecz o chałupie na kierej downij wisioł szyld “Natur House”, a dzisio w tym samym miejscu sóm “Tkaniny”. To był dobry napad przechrzcić tyn krzeft, bo isto moc tusteloków schudło i ancugi dzisio na nich wiszóm jak na orstwi i ty “Tkaniny” majóm tam jak znaszeł. Chocioż chłopi isto nie dajóm im tam moc utarżyć, bo s szyrokich galot zrobić wónski poradzi każdo szwoczka. Paniczki uż takich rzeczy dzisio nie robióm, bo moda tak rzynie, że żodno baba jak schudnie to niczego nie przeszywo yno leci s tym zaroz do chasioka. Wedla we dwiyrzach, kierysi odewrził “Kusa Suschi” i na zicher u nich s tego surowego jedzynio żodyn żróń nie stłóśnie i bydzie móg sie u nich nabonckać wiela chce. To jejich jedzyni worce, coby podniebiynia tusteloków tego poprógowały, a na zicher uż isto nieskorzij żodnej owiynziny ani zabijaczkowego miynsa do gymby nie weznóm. Luto mi je, że żodyn nie wyszpekulyrowoł, coby to nasze cieszyński i gorolski jedzyni też kansi posłać do świata tak jak zrobiły to u nas Japóńce. Zaimawe je dlo mie to, czy baji tam kansi w Tokio abo w Nagasaki uż możne egzystuje gospoda w kierej idzie wciepać na ruszta faszyrke abo jelitka z modróm kapustóm, a potym to popić kiszkóm. Isto na zicher nie pudzie tam dostać ciepłej pyrdelónki, wyrzosków i ani dobrego preswórsztu. Mini słownik: Tóż miyjcie sie wszedcy dobrze i wiesiołego popióntku Felieton pt.:”Zjeś faszyrke”
|
reklama
|
Dodaj komentarz