CO TYDZIYŃ PO NASZYMU: Źdiorba i zmazany papiór

”...poszkryfano brunatno szopka...". fot. FJD

"...pa płocie przidrótowane chwolidło...". fot. FJD

SZPACYRKYM PO CIESZYNIE

"Moja ty słodko cieszyńsko mowo
być zawsze do prawjynio gotowo
a jak cie uż żodyn nie bydzie rozumioł
to jyny wiater bydzie po naszymu szumioł"

POZÓR! Kiery nimo chynci tego czytać, abo kansi wraził łokulory, abo mo moc roboty i łoczy go bolóm to se może tego posłóchać jak prziciśnie ”kursywom” na tóm czornóm szczałke w tej szarej kostce, kierom nóndzie zaroz pod spodkym.

Źdiorba i zmazany papiór

Coroz bardziyj je przikry tyn kopiec pod kiery prziszło nóm sie dropać, ale uż roz dwa bydymy na wyrchu. Eszcze ciepnymy łoczami roz do lewa a po drugi do prawa i cosi sie isto trefi do łopisanio. Zaroz za tóm chałupóm co kiejsi patrziła do familiji Cinalów je cesta ku poru spóldzielczym blokóm, kiere tam zustały w siedymdziesióntych rokach postawióne. Zaroz na winklu stoji poszkryfano brunatno szopka do kierej tustelocy wyciepujóm capart, ździorba i zmazany papiór. Kapke wyżyj do dwóch zileźnych rułek prziszrubowano je tabulka, kiero prawi, gdo pumorze nóm porachować podatek łod wypłaty. Na prociw na płocie przidrótowane je chwolidło, kiere namowio nas uż po drugi do marketu “Lemon” i wólki nie wólki trzeje bydzie tam do niego zozdrzić. Kónsek dalij je krziżowatka s ulicóm Hallera, a kapke wyżyj tako samo s ulicóm Mickiewicza na kierej stoji tyn sklep, kiery mo eszcze jedno chwolidło na skryncie. Kierysi doł se zoleżeć na tym, coby na tych trzóch chwolidłach napisać wiela metrów genał eszcze trzeja bydzie sie szmatłać, coby na nich trefić. Dobrze, że nima to pisane w minutach tak jak to majóm inksze kszefty w Cieszynie, bo ku tymu trzeja by było przipnóć tabule dlo tych co s tym szmatłanim sie do wyrchu majóm łostude. Na taki tabuli trzeja by było napisać wiela gdo mo roków i czy to je chłop abo baba i każdy by se snadno porachowoł wiela czasu zustało mu do pozbycio sie piniyndzy w tym kszefcie. Po ceście eszcze uwidzymy czornóm gablote w kierej dziynnie wieszane sóm bioło-czorne kartki s kierych idzie sie dowiedzieć gdo uż do tego kszeftu wiyncyj nie przidzie.

Mini słownik:

ciepnóć - rzucić,

kiejsi - kiedyś,

familija - rodzina,

cesta - droga,

winkiel - narożnik,

patrziła - należała,

poszkryfano - pomazana,

capart/ździorba - graty,

prziszrubować - przykręcić,

krziżowatka - skrzyżowanie,

chwolidło - reklama,

genał - dokładnie,

łostuda - kłopot,

snadno - łatwo,

kszeft - sklep.

Miyjcie sie wszedcy dobrze i wiesiołego popióntku!

Dzisiejszy tekst ma tytuł "Źdiorba i zmazany papiór".