CO TYDZIYŃ PO NASZYMU: Jeszcze moc ludzi hajcuje wónglim

"...była kiejsi stolarnia pana Cinala...". fot. FJD

"...projekt likwidacji niski emisyji...". fot. FJD

SZPACYRKYM PO CIESZYNIE

"Moja ty słodko cieszyńsko mowo
być zawsze do prawjynio gotowo
a jak cie uż żodyn nie bydzie rozumioł
to jyny wiater bydzie po naszymu szumioł"

POZÓR! Kiery nimo chynci tego czytać, abo kansi wraził łokulory, abo mo moc roboty i łoczy go bolóm to se może tego posłóchać jak prziciśnie ”kursywom” na tóm czornóm szczałke w tej szarej kostce, kierom nóndzie zaroz pod spodkym.

Wiszóm wedla dwiyrzi

Dzisio bydymy sie kludzić ku wyrchu ulicóm Górnóm, ale po ceście po łobu strónach na cosi sie przeca jeszcze podziwómy. Zaroz za tym wielkim chwolidłym je krziżowatka s ulicóm Sikorskiego i tam w jednej s chałup obstoł sie naprawiacz radijów i telewizorów. To je fakt fest zaimawy, że przy teroźniejszej transformacyji żodyn ich tam stela nie wyciepoł i nima tam dzisio jakigosi ciuchlandu. Kiejsi tacy sprawowacze chodzili wiyncyj po chałupach, bo telewizory były tak ciynżki, że yno gdo mioł moc pary w sobie to poradził telewizor dźwignóć ze sojigo szranku i do nich go zanyś. Dzisio wszecko zrobiło sie plaskate i leksze, tóż też każdy to swoji małe kino może weznóć pod parze i tam na pieszki do nich ś nim zónś. Takóm nóm wygode tyn postymp dzisio fundnył, a eszcze niekierzi se tego nie wożóm i fórt na wszecko mamrzóm. Za skryntym na prociw była kiejsi stolarnia pana Cinala a dzisio sie tam nic nie ruszo i nie wiym co sie ś nimi stało. Wiszóm tam yno dwie wielki płachy z kierych sie idzie dowiedzieć, że cosi w tej chałupie je do przedanio, abo do najyńcio. Przi ceście na ścianie przirażóne sóm aże sztyry antyny, kiere prawióm nóm ło tym, że kierysi tam eszcze miyszko. Teraz zaś przechópnymy na drugóm stróne cesty, coby obezdrzić taki dwie tabule kiere wiszóm wedla dwiyrzi we dwóch blokach. Je na nich tak cosi dziwokigo popisane, że trzeja być fest uczonym, coby zachycić ło co sie rozchodzi. Pisze tam na nich ło tym, gdo zafundowoł jakisikej projekt likwidacyji niski emisyji w postrzodku Cieszyna. Dlo mie je to moc dziwoki, bo po piyrsze od postrzodka Cieszyna czyli Rynku je bezmała tam s tela jedyn kilometer, a po drugi nic nie pisze o jakóm emisyje sie rozchodzi.

Mini słownik:

kludzić - przeprowadzać,

cesta - droga,

zaimawe - interesujące,

wyciepoł - wyrzucił,

szrank - komoda,

pod parze - pod rękę,

nie wożóm - nie doceniają,

przirażóne - przytwierdzone,

przechópnóć - przeskoczyć,

dziwoki - niezrozumiałe,

zachycić - załapać,

bezmała - podobno.

Miyjcie sie wszedcy dobrze i wiesiołego popióntku!

Dzisiejszy tekst ma tytuł "Wiszóm wedla dwiyrzi".