CO TYDZIYŃ PO NASZYMU: Nasze dziecka latoś zaś bydóm sie cioprać w basynie

”Mogymy se skoczyć na piwo...”. fot. FJD

”..postawili wielkóm tabulke s kamiynia...”. fot. FJD

SZPACYRKYM PO CIESZYNIE

"Moja ty słodko cieszyńsko mowo
być zawsze do prawjynio gotowo
a jak cie uż żodyn nie bydzie rozumioł
to jyny wiater bydzie po naszymu szumioł"

Zielóne chrosty

Stanylimy dzisio przi basynie na kiery też isto brakło piniyndzy, coby chocioż kapke łopyrskać wopnym ściany tej podłógowatej chałupy. Pore roków tymu magistrat wyszkroboł pore groszy na nowy betón i jakosi sie podarziło zrychtować tym basyn w kierym sie idzie cioprać, abo pływać jak kiery poradzi.Ty miejsca kaj sie trzeja przewlyc i iś za potrzebóm fórt wyglóndajóm jak za Franca Jozefa i jakosi nima widoków na nic lepszego. Na tym naszym basynie mielimy też kiejsi wielkóm trampoline s kierej szło se skoczyć aji s dziesióntki, ale isto to kómusi zawadzało i jóm obalili. Myślym se, że isto skyrs tej głymboki na sztyry metry dziury, kiero była pod tóm tramkóm, a gdosi przi remóncie kozoł jóm zasuć i trampolina bez ni może egzystować. Dzisio zamias se skoczyć s trampki do wody mogymy skoczyć na piwo, bo zaroz wedla tego basynu kierysi postawił budke s pieknym paryzolym i piwo tam przedowo. Myślym, że latoś we feryje jak bydzie piekny czas to nasze dziecka, kiere nigdzi s łojcami nie pojadóm bydóm sie mógły cioprać w tym naszym cieszyńskim basynie jak nie bydzie zawrzity. Kapke dalij za tym basynym były kiejsi korty, ale dzisio nie wiym czy tam eszcze co je, bo przi płocie rosnóm same zielóne chrosty i do postrzodka nie idzie zozdrzić. Za to na płocie wisi tabulka s kierej idzie sie wywiedzieć, że wachuje go jakisi TIFOM, a klub mianuje sie ”Ogniwo”. Na prociw tego płota po drugi stronie cesty Cieszyniocy postawili wielkóm tabule s kamiynia na kierej idzie poczytać gdo w czasie wojny pożegnoł sie ze swoim życim. Byli to ludzie kierzi chcieli być dobrymi Polokami, a tym kierzi na nas napadli sie to nie podobało.

Mały słownik:

łopyrskać - opryskać,

podarziło - udało,

zrychtować - naprawić,

kiejsi - kiedyś,

obalili - przewrócili,

skyrs - z powodu,

wedla - obok,

łojcowie - rodzice,

chrosty - krzaki,

latoś - w tym roku,

wachuje - pilnuje.

Mjyjcie sie wszedcy dobrze i wiesiołego popióntku.

Dzisiejszy tekst ma tytuł ”Zielóne chrosty".