CO TYDZIYŃ PO NASZYMU: Mikołajowy kszeft

"...wyglóndajóm uż wieczno-żywobytni gojiczki". fot. Ewelina Szuścik

"Doimyntnie to je taki Mikołajowy kszeft". fot. Ewelina Szuścik

Dzisio na tym naszym szpacyrku skryncymy w prawo od tego kszeftu, kaj sprzedujóm to wartki jodło i zmarzline. Tam kónszczyczek dalij po lewej strónie, je tako bioło i długo chałpa kaj sprzedujóm roztomajte wieca. Ze siyni tej chałpy wyglóndajóm uż wieczno-żywobytni gojiczki. Dyć je dziepro kóniec listopada... Tak żech se wszymła, że z roku na rok tyn starzik czasowy co roz szybcij żynie i ty świynta łokropnie wczas zaczyno. Jako by sie na to nie dziwać, to ni ma sie co ś nim szkubać, bo i tak jak to ze starzikami bywo, je uż głuchy i ku tymu uwziynty. Ta bioło chałpa mianuje sie "Api", a idzie tam dostać roztomajte bawidełka, wszecko do szkolnioka, prezynty na geburstag baji strzybne oryngle, piersciónki i mocka inkszych wiecy. Skuli tego, że idzie tam kupić prawie wszecko, co dziecka majóm rade, tak se myślym że nie jedyn Mikołaj Świynty abo ni, też sie tam do widzieć. Dzisio dziecka dostowajóm mocka bawidełek kiere nie wiedzieć czymu, roz dwa sóm im zbyteczne i wartko sie im mierznóm. Kiesi moja starka spóminała jako to hańdownij było, kie czakali jako małe kluki na Mikołaja. Tyn zaś nie chodził sóm yny zawsze ś nim chodzowoł też dioboł i żodyn nie opoworził sie powiedzieć, że to stresuje dziecka. Dycki wszecki małe rojbry były potym słuszne. Nie dostowali wielkich prezyntów, bo była wiecznie biyda, yny jabłuszka, pieczki s jabłek i gruszek, orzechy zawiniynte w strzybne papiyrki do kierych sie wstyrkało zapałke i wieszało potym na gojiczku. Czasym też dostowały dziecka pore kopalnioków. Chocioż nie było tego moc, zawsze czakały na Mikołaja z wielkóm radościóm. Czasy sie zmiyniły i wszecko idzie dostać, aji tyn co ni mo wiela pininydzy we szparkasie, cosi nóndzie do swojich dziecek baji w takim "Api". Nawet dzisio kie mało kiere dziecko wierzi w Mikołaja, to i tak kożde sie cieszy z prezyntu. Dycki to dobre mieć na pozoryndziu taki kszeft, bo to je tak, jak by w jednej chałpie były nejmiynij sztyry kszefty, a tak pospołu je jedyn ze wszeckim .Doimyntnie to je taki Mikołajowy kszeft.

Mini słownik: