CO TYDZIYŃ PO NASZYMU: Kiejsi my se sami wszecko wyrobialibyć zawsze do prawjynio gotowo a jak cie uż żodyn nie bydzie rozumioł to jyny wiater bydzie po naszymu szumioł" Tyn nasz Cieszyn rozgałynzio sie we wszecki stróny, ale dzisio eszcze tymu dómy pokuj i kiejsi nieskorzij pujdymy cestami ku Goleszowu i Skoczowu. Zaś dzisio jak przyndymy spadki przez tyn maluśki mostek na Boguniówce to po lewo bydymy widzieć pochynióne hale downego ”Fachu”. Nie wiym jako łóni tam dzisio egzystujóm, bo yno jakosi pieknie opucowali chałupe w kierej kiejsi mieli biura. Możne, że dzisio też tam sóm same urzyndniki, ale za co bierom pinióndze na to żech nie prziszeł. A ty hale w kierych kiejsi cosi wyrobiali uż sóm dokumyntnie zarośnióne wszelijakimi krzokami i ciynżko je tam cosi w postrzodku uwidzieć. Wyglóndo to tak jak pradawne indyjański budowle nóndzióne kansi we meksykańskim buszu. Tak rozmyślóm jako to bydzie za sto roków jak naroz sie kómusi zazdo coby zrobić wielki łodkryci downej przemysłowej kultury Cieszyna. Isto aji ło tym ksiónżke napiszóm i bydóm sie chwolić na cały świat jako to se dobrze kiejsi tustelocy radzili. Rozchodzi sie ło to, że poradzili sami cosi wyszpekulyrować, a potym aji to wyrobiać. Nie potrzebowali żodnych licyncyji ani zachodnich móndroków coby cosi przidajnego dlo Poloków na swojim wercjgu i maszynach puszczać do świata. Isto sie bydóm potym wszedcy dziwować jako to było możne, że mieli wszecki wercojgi swoji nie potrzebowali nic łod żodnego. Jakby ganc tak samo kierysi dzisio pomyśloł to dalij cieszyniocy mieli by robote u siebie i u żodnych cudzych ludzi na zachodzie nie potrzebowli by ji chledać. Jak żech sie eszcze roz przyzdrził tymu biurowcu kaj siedzom urzyndniki toch prziszeł na to za co łóni bierom pinióndze. Na przeca najyli cały spodek tej chałupy i to możne je cało tajymnica. Mini słownik: Miyjcie sie wszedcy dobrze i wiesiołego popióntku! Dzisiejszy tekst ma tytuł "Pochynióne hale".
|
reklama
|
Dodaj komentarz