CO TYDZIYŃ PO NASZYMU: Marasu i charapucio idzie dzisio nónś pełno w każdym potoku

”...gelender na moście...”. fot. FJD

”...ni ma w ni żodnych ryb...”. fot. FJD

Strzigani trowy miało sie skóńczyć skyrs tego, że fórt mómy niewiela deszcza i moc dziedzin dało se uż s tym pokuj. Było ło tym, też u nas pełno rzeczy, że trzeja bydzie aji w Cieszynie dać se pokuj s tym strziganim trowników. Dzisio uwidziołech jednego chłopa jak strzigoł trownik przed szkołom nomero dwa i wartko żech sie go spytoł gdo mu to kozoł. A łón mi rzeknył, że sóm se kozoł i na tym sie to skónczyło, bo dalij nie było ło czym prawić. Zdało sie, że uż przeca wszedcy prziszli na to, że tako nie strzigano trowa dzierży w sobie wiyncyj wody i skyrs tego, bydzie w ni wiyncyj chroboków, kiere majóm rade rozmajte ptoki. W tej trowie też rosnóm wszelijaki kwiotki, kiere zapylajóm pszczoły i siadajóm też na nich insze myntle. To wszecko bydzie dalij fungowało jak bydzie w ziymi woda, a jak s tym nic nie zrobiymy to bydymy za niedłógo ciynko piskać. Kiery to mo zarzóndzić, abo rozkozać tego nie wiym, ale sie mi zdo, że wszedcy muszóm s tym sami prziś do porzóndku, bo jak wody chybi w studniach i w waserlajtungu to trzeja sie bydzie wartko brać s tego świata. Woda, coby była do picio, nie śmy mieć w sobie żodnego marasu, bo ś niego bieróm sie rozmajte choróbska. I tymu trzeja wszecko robić, coby żodne charapuci, ani charmyzi nie było wyciepowane do wody i do inszych potoków. Nie rozumieli tego isto ci co ze dwa tydnie tymu łodziyrali ze starej farby gelender na moście pod kierym płynie Bobrówka i te staróm farbe do ni wciepowali. Całe szczynści, że ni ma w ni żodnych ryb, kiere by sie tóm farbóm poradziły wartko otruć.

Mini słownik:

strzigani - strzyżenie, skyrs - z powodu, fórt - ciągle, dziedzina - wieś, pokuj - spokój, wartko - szybko, rzeknył - powiedział, prawić - mówić, dzierży - trzyma, chrobok - robak, myntle - motyle, fungowało - działało, prziś do porzóndku - zrozumieć, chybi - zabraknie, waserlajtung - przewód wodny, maras - brud, charapuci - zużyte rzeczy, wciepowane - wrzucane, gelender - poręcz, wartko - szybko.

Tóż mjyjcie sie wszedcy dobrze i wiesiołego popióntku