CO TYDZIYŃ PO NASZYMU: Łostuda to je tako wiec s kieróm dycki mómy łostude

Jak dłógo to eszcze taki bydzie? Że jak człowiek dzisio sie na kogosi podziwo, to każdy mo łosowiałóm gymbe i nie wiadómo, czy przidzie taki czas, że ty gzychty kiejsi sie ludzióm wyproszczóm. Dycki hańdowniji znaszli sie tacy móndrocy, kierzi wszecko wiedzieli i poradzili rzeknóć, co trzeja robić coby było wiesioło. Dzisio bardzo tym móndrokóm to nie idzie, bo tóm trategije przismycznył tu do nas taki jedyn, co go nie widać na łoczy i nie wiedzieć kaj skoczyć, coby sie przed nim nie uchrónić. Skyrs tego wszedcy siedzóm dóma i na obkoło glacujóm wszecki ździorba, kiere przez dłógi roki snoszali do chałupy. Szranki, odmaryje i insze podstólki sóm isto uż ze sto razy przeglóndnióne i zbyteczne wieca leżóm na chasioku przed chałupóm. Wszecko je pozawiyrane i yno co poniekiere gospody dajóm tustelokóm pojeś, ale yno do papiórka. Tela w tym je chocioż dobrego, że poradzymy to do siebie weprać po chodniku, jak mómy prózny bachórz i nóm w nim burczy. Kapke bydzie s tym łostudy, bo przez te maske kieróm muszymy mieć na gymbie to s żodnym jedzynim do gymby przeca nie trefiymy. Je na to jednakowóż tako rada, że bydymy sie musieli przeszpacyrować s tym jed przez nasz cieszyński Lasek Miejski w kierym mogymy te maske ściepać s gymby i wartko s tym jedzynim prziś do porzóndku. Łostuda yno bydzie na prziszły tydziyń s lodami, jak władza powoli ich przedowani, a maski na gymbach dalij trzeja bydzie dzierżeć. Kszefcić s tymi lodami isto bydóm musieli, yno pod keirymsi strómkym w Lasku Miejskim.

Mini słownik:

podziwo - popatrzy, gzycht - twarz, wyproszczóm - wyprostują, dycki - zawsze, rzeknóć - powiedzieć, móndrok - mądrala, przismyczył - przyciągnął, kaj - gdzie, skyrs - z powodu, glancujóm - czyszczą, snoszali - znosili, ździorba - nipotrzebne rzeczy, szrank - komoda, odmaryja - szafa, podstólek - szuflada, wieca - rzeczy, chasiok - śmietnik, pozawiyrane - pozamykane, poradzymy - potrafimy, weprać - wcisnąć, bachórz - brzuch, kapke - trochę, łosuda - klopot, ściepać - zrzucić, prziś do porzóndku - załatwić, strómek - drzewko.

Tóż mjyjcie sie wszedcy dobrze i wiesiołego popióntku