CO TYDZIYŃ PO NASZYMU: Latoś tej zimy isto żodno guńka nie bydzie przidajno

...kiery mioł miano “Natur House”

Zeszły tydziyń mielimy w naszym mieście narodowe strzylani, a tydziyń nieskorzij wielki szpacyrowani. Kiery prziszeł na to, coby ukazować te tradycyje Trzóch Króli w naszym mieście, to patrziło by sie go pochwolić. Mómy yny łostude s pogodóm, bo nie wiadómo jako sie na tyn dziyń oblyc, czy naździoć na sie jakisikej mantel czy możne ukozać sie po latowymu. Zeszłego roku jak nawszczywił nas tu w Cieszynie na Trzóch Króli prezydynt Anrzej Duda to było tak zima, że nie szło ustoć i trzeja było przestympować s nogi na noge. Nie wiym czym se tego roku zasłóżyli Skoczowiocy, że zamias zimy mieli lato i niekiere paniczki mógły paradować przed prezydyntym w letnich szatach, a chłopi yno w samych ancugach i bez kłobuków na czepani. Tyn piekny czas, kiery nawszczywił nas tego roku, nie poradzi ludzióm fórt dać do rozumu, coby auciska niechowali dóma. Tóż też to szpacyrowani po naszym mieście je yno przidajne dlo chłopów, kierzy eszcze nie wiedzóm jakigo by se kupić strupa przismyczonego ze zachodu, bo tego charapucio idzie dziśka moc uwidzieć na wszeckich cieszyńskich cestach. Dzisio zastawiymy sie przi chałupie na Mynniczej s nomerym osim a sztyrycet, w kierej je taki miszung kszeftów, że nie wiym łod kierego zacznóć. W tych nejwiynkszych dwóch auslagach, kiejsi był kszeft, kiery mioł miano “Natur House” i namowioł tłóstych tusteloków, coby wciepowali na swoji ruszta wszecko to co dowo nóm notura. Poradzili sie też chwolić na plakatach, wiela to kilo dziynka nim, tustelocy poradzili ze siebie ściepać niepotrzebnego fetu.

Mini słownik:
nieskorzij-później,
to patrzi-należy,
łostuda-kłopot,
naździoć-naciągnąć,
mantel-płaszcz,
nawszczywił-odwiedził,
szaty-sukienka,
ancug-ubranie,
kłobuk-kapelusz,
czepań-głowa,
fort-ciągle,
niechowali-zostawiali,
charapuci-graty,
cesta-droga,
wciepowali-wrzucali,
auslaga-wystawa,
ściepać- zrzucić,
fet- tłuszcz.

Tóż miyjcie sie wszedcy dobrze i wiesiołego popiontku