, środa 30 listopada 2022
CO TYDZIYŃ PO NASZYMU: Hajcowani pod blachóm, to je procno wiec
Fórt ta zima nie chce iś tam skónd prziszła i skyrs tego widać naobkoło, jak i czym tustelocy hajcujóm pod blachóm. Jak tak przidzie ku wieczoru, to widać, że s kuminów wali do luftu czorny dym i eszcze łón przi tym smerdzi jak diasi.  fot: FJD



Dodaj do Facebook

CO TYDZIYŃ PO NASZYMU: Hajcowani pod blachóm, to je procno wiec

Szpacyrkym po Cieszynie
“Gdo sie za swój jynzyk wstydzi takim nich sie każdy brzidzi”

"Moja ty słodko cieszyńsko mowo
być zawsze do prawjynio gotowo
a jak cie uż żodyn nie bydzie rozumioł
to jyny wiater bydzie po naszymu szumioł"

POZÓR! Kiery nimo chynci tego czytać, abo kansi wraził łokulory, abo mo moc roboty i łoczy go bolóm to se może tego posłóchać jak prziciśnie tóm biołóm szczałke w tej czyrwiónej kostce, kieróm nóńdziecie pod spodkym”.

Hajcujóm pod blachóm

Fórt ta zima nie chce iś tam skónd prziszła i skyrs tego widać naobkoło, jak i czym tustelocy hajcujóm pod blachóm. Jak tak przidzie ku wieczoru, to widać, że s kuminów wali do luftu czorny dym i eszcze łón przi tym smerdzi jak diasi. Kiejsi jak nasze starki pośmiatały kuchyń, a na dziedzinach plac przed chałupóm, to ty śmiatki dycki były ekologiczne. Żodyn, żodnego nie przeganioł, że wciepuje to pod bachem, bo wiedzioł, że cosi s tym trzeja przeca zrobić. Łogiyń dycki skłodało sie pod blachóm łod dołu s rozmajtych szczapów, abo okorków, a na wyrch nasuty był wóngiel s naszych polskich szachtów. Ale coby sie to dobrze rozgorało, to ganc na samyym spodku trzeja było dać jakómsi staróm uż poczytanóm gazetem. Wciepowało sie też do spolynio pod blachóm rzoz, abo inksze rozmajte hoba i harapuci. A to charapuci brało sie dycki s rozrażónych starych sztokerlików, szranków i inszych odmaryjów, kiere wciepowane były do łognia i jakosi nieskorzij to nigdy nie smerdziało. Dzisio dziepro wiym, skyrs czymu szło kiejsi wydychać pełnym plucym, chocioż ludzie też hajcowali rozmajtym charmynzim, capartym, ździorbami. Rozchodzi sie ło to, że wszecko kiejsi bylo jakisi insze i możne skyrs tego gorało to pod blachóm bez żodnego smrodu. Aji ty stare gazety gorały lepszyj, bo nie było na nich tej rozmajtej barewnej farby, kiero w łogniu smerdzi przeokrpnie. Możne, że tym dzisiejszycm czasóm pumóg by tyn napad skłodanio łognia pod blachóm ganc na łopak. Nejprzód wóngiel neskorzij trzoski i szczapy, a dziepro na kóniec jakisi papiór i to nejlepszyj taki niezadrukowany.

Mini słownik gwary cieszyńskiej:

fórt - ciągle, skyrs - z powodu, hajcujóm - palą, pod blachóm - w piecu, luft - powietrze, jak diasi - jak diabli, kiejsi - kiedyś, starki - babcie, dziedzina - wieś, dycki - zawsze, żodyn - nikt, wciepuje - wrzuca, skłodało sie - podkładalo się, wyrch - góra, szachta - kopalnia, ganc - całkiem, rzoz - trociny, hobo - grat, charapuci - rupiecie, skyrs - z powodu, hajcowali - palili, charmynzi - chrust, capart - rupiecie, ździorba - stara rzecz, barewnej - kolorowej, napad - pomysł, trzoski - wióry, ganc - całkiem.

Tóż miyjcie sie wszedcy dobrze i wiesiołego popióntku.

Komentarze: (0)    Zobacz opinię czytelników (0)    Dodaj opinie
Redakcja nie ponosi odpowiedzialności za treść komentarzy pozostawionych przez internautów. Komentarz dodany przez zarejestrowanego użytkownika pojawi się na stronie natychmiast po dodaniu. Anonimowy komentarz zostanie opublikowany z opóźnieniem, po jego akceptacji przez redakcję. Komentarze niezgodne z regulaminem będą usuwane.

Dodaj komentarz

Zawartość pola nie będzie udostępniana publicznie.
  • Adresy internetowe są automatycznie zamieniane w odnośniki, które można kliknąć.
  • Dozwolone znaczniki HTML: <em> <strong> <cite> <code> <ul> <ol> <li> <dl> <dt> <dd>
  • Znaki końca linii i akapitu dodawane są automatycznie.

Więcej informacji na temat formatowania

Image CAPTCHA
Wpisz znaki widoczne na obrazku.
reklama
reklama