”...ganz dobre glajzy...”. fot. FJD

Kupa skolo

Zdało mi sie, że uż na Głymbki nie pudzie nic zaimawego uwidzieć, bo porem miesiyncy je na ni yno sóm maras i kupa skolo. Ale to sie mi yno tak zdało, bo przedstowcie se, że tyn tydziyń szło uwidzieć jak ci chłopi przewleczóni w ty żółte arbajtancugi wrażowali do ni ganc dobre glajzy. Nie poradziłi mi jednakowóż rzeknóć, kiery mioł taki napad i kiery im to kozoł. Dołech sie ś nimi do rzeczy, coby łod nich cosi sie wywiedzić, ale nejprzód musiały mi sie na łoczy ciepnóć s hańdownych czasów ruski bukwy, skyrs tego, bo łóni rzóndzili yno sy mnóm jakiómsi wschodnióm rzeczóm. Nie podarziło mi sie też trefić na jejich “kamandira” i skyrs tego do dzisia nie wiym po co ty glajzy do tej ziymi tam wrażowali. Możne, że kierysi im rzeknył ło tym, że sto roków tymu na takich samych glajzach gzuł po Głymboki CIESZYŃSKI TRAMWAJ i skyrs tego sami od siebie zaczli te sztreke ukłodać. Nikiedy jak sie kómusi zrobi luto, to poradzi drugimu dać z darma to, na co tyn drugi ni ma ani przirychtowany. Tak isto to stało sie s tóm nowóm sztrekóm, kieróm cieszyniocy uwidzieli i zaczli chwolić tych naszych pobratymców za to, że duchli w nas nadzieje na nowy CIESZYŃSKI TRAMWAJ. Jak to pudzie s tóm sztrekóm dalij tego nie wiym, ale jak ty glajzy zustały tam wrażóne ganc s skyrs inszej wiecy, to na zicher na kogosi wykidze sie moc marasu. Bo przeca, coby ziym stwardła kidze sie do ni betón, kiery nigdy nie zar-zowi, a glajzy, kiere sóm s zielaza dać tam, kaj by były lepszyj przidajne.

Mini słownik gwary cieszyńskiej:

zaimawy - interesujący, maras - brud, skoli - kamienie, szło uwidzieć - można było zobaczyć, przewleczóni - przebrani, arbajtancug - ubranie robocze, wrażowali - wkładali, glajzy - szyny, rzeknóć - powiedzieć, napad - pomysł, nejprzód - najpierw, ciepnóć - rzucić, hańdowne - dawne, bukwy - litery, skyrs - z powodu, rzóndzili - mówili, podarziło - udało się, wrażowali - wkładali, gzuł - pędził, sztreka - tor, przirychtowany - przygotowany, luto - przykro, duchli - dmuchnęli, skyrs - z powodu, wiec - rzecz, kidze - wylewa, zar-zowi - zardzewieje, zielazo - żelazo, przidajne - przydatne.

Tóż miyjcie sie wszedcy dobrze i wiesiołego popióntku.