“Gdo sie za swój jynzyk wstydzi takim nich sie każdy brzidzi”
"Moja ty słodko cieszyńsko mowo
być zawsze do prawjynio gotowo
a jak cie uż żodyn nie bydzie rozumioł
to jyny wiater bydzie po naszymu szumioł"
POZÓR! Kiery nimo chynci tego czytać, abo kansi wraził łokulory, abo mo moc roboty i łoczy go bolóm to se może tego posłóchać jak prziciśnie tóm biołóm szczałke w tej czyrwiónej kostce, kieróm nóńdziecie pod spodkym”.
Syry nafilowane
Idzie eszcze trefić na takich ludzi, co poradzóm cosikej sami dóma zrobić i nieskorzij prugujóm to przedać. Zeszłóm niedzielem na rynku w Cieszynie, szło takich ludzi potkać, kierzi ty swoji bibeloty chcieli kómusi pociś. Taki naprowde przidajne wieca, uż dzisio sie robi yno we fabrykach i skyrs tego je to tani i każdy może tych porem groszy ze swoji szrajtofli na to wysmyczyć. Zaś ty wieca, kiere ludzie robióm swojimi rynkami muszóm być droksze, bo trzeja na nie wiyncyj czasu zmitrynżyć. Moc też je takich, kiere żodnymu tym padym na nic nie sóm przidajne, bo stawiane sóm nieskorzij yno na jakimsi szranku, abo przi łoknie. Sóm to rozmajte żbónki, jaśki, lalki, talyrziczki, aniołki, barewne kiśniczki i aji świyczki z pszczeligo wosku, kiere nigdy nie bydóm rożnióne. Trefić też idzie na przidajne wieca, kierych w żodnym kszefcie sie nie kupi. Dejmy na to, jedna paniczka miała do przedanio rozmajte taszki uszyte ze starych dżinsowych galot. To sie paniczom fest podobo, bo każdo ta taszka je inszo, a ło to przeca sie babóm rozchodzi, coby kamratka ni miała taki samej. Szło też uwidzieć jaksi szpecyjalne biołe syry, nafilowane rozmajtymi zielinami, knoblochym, słónecznikym, pokrziwóm i aji trowóm, kieróm sie moczo w żubrówce. I ło to sie rozchodzi, coby ludzie se mógli pomaszkiecić czymsi czego w normalnym kszefcie ni ma i choć roz do roka nafilować swój bochórz szpecjalnóm dobrocióm. To samo szło uwidzieć pod budóm s miodym, bo tyn panoczek, kiery go zachwoloł, mioł go wszelijaki. Wyglóndo na to, że isto rajzowoł s tymi swojimi ulami kaj yno móg, bo mioł miód aji s lasa, podobnież jak taki jedyn, kiery mioł w w biołych szmacianych pytelkach rozmajtóm herbatem.
Redakcja nie ponosi odpowiedzialności za treść komentarzy pozostawionych przez internautów. Komentarz dodany przez zarejestrowanego użytkownika pojawi się na stronie natychmiast po dodaniu. Anonimowy komentarz zostanie opublikowany z opóźnieniem, po jego akceptacji przez redakcję. Komentarze niezgodne z regulaminem będą usuwane.
Dodaj komentarz