Podziwejcie sie ludzie jako to dzisio lekuśko idzie cosi inszym ludzióm zagrać. Styknie postawić kansi taki maluśki szrank s klawiaturóm i nic wiyncyj nie trzeja do granio. fot: FJD
CO TYDZIYŃ PO NASZYMU: Dzisio grać ludzióm idzie byle kaj
“Gdo sie za swój jynzyk wstydzi takim nich sie każdy brzidzi”
"Moja ty słodko cieszyńsko mowo
być zawsze do prawjynio gotowo
a jak cie uż żodyn nie bydzie rozumioł
to jyny wiater bydzie po naszymu szumioł"
POZÓR! Kiery nimo chynci tego czytać, abo kansi wraził łokulory, abo mo moc roboty i łoczy go bolóm to se może tego posłóchać jak prziciśnie tóm biołóm szczałke w tej czyrwiónej kostce, kieróm nóńdziecie pod spodkym”.
Na hóślach
Podziwejcie sie ludzie jako to dzisio lekuśko idzie cosi inszym ludzióm zagrać. Styknie postawić kansi taki maluśki szrank s klawiaturóm i nic wiyncyj nie trzeja do granio. Nie trzeja ani mieć blisko sztrómu, bo idzie ze sebóm przismyczyć byle jaki akumulator i taki szrank bydzie sóm groł. Nikierzi eszcze ku tymu poradzóm cosi aji pośpiywać i jak człowiek zawrze łoczy to słyszy caluśkóm łorkiestre. Kiejsi, to żodyn na polu nie groł, bo nie było na to placu, chociożby skyrs tego, że trzeja było dycki ku tymu graniu napytać porem muzykantów. Jedyn groł na trómpecie drugi na hóślach, trzeci pinkoł na fusharmóniji a eszcze inszy klepoł do kupy dwóma zieleźnymi talyrzami, abo bymbnił na jakichsi garcach. A przi tym trzeja było ganc wedla nich stoć, coby słyszeć jak pieknie grajóm i śpiywajóm. Dzisio wszecko idzie po drótach i każdy jednako słyszy kaj se yno stanie, bo głośnik mo dycki przed, abo za sebóm. Skyrs tego idzie dzisio uwidzieć moc rozmajtych grajków, kierzi siedzóm na cestach i słyszeć ich uż s daleka. Rozmajci młodziocy grajóm kaj yno popadnie i eszcze dycki na tym porem groszy se utarżóm. Zeszły tydziyń szło uwidzieć takóm szykownóm dziełuszke s chłapcym, kierzi grali ludzióm przed tyjaterym. Nie wiym yno skyrs czymu se dali taki dziwoki miano-“CHŁODNO”– bo przeca jak sie kómusi gro muzykem, to raczyj je wszeckim cieplij. A eszcze jak wedla takich grajków je kapkem placu do tańcowanio, to naprowdem idzie sie dobrze zagrzoć. Taki mómy dzisio czasy, że poradzi śpiywać aji tyn, co nimo żodnego głosu, bo zesilić to co buczy pod nosym idzie tak fest, że żodyn sie ani nie skapuje jaki mo naprowdem tyn głos.
Redakcja nie ponosi odpowiedzialności za treść komentarzy pozostawionych przez internautów. Komentarz dodany przez zarejestrowanego użytkownika pojawi się na stronie natychmiast po dodaniu. Anonimowy komentarz zostanie opublikowany z opóźnieniem, po jego akceptacji przez redakcję. Komentarze niezgodne z regulaminem będą usuwane.
Dodaj komentarz