CO TYDZIYŃ PO NASZYMU: Wieca ku budowie sóm przi każdej ceście

”...Mmma Mia...”. fot FJD

”...w tym pochyniónym FACHU...”. fot. FJD

SZPACYRKYM PO CIESZYNIE

"Moja ty słodko cieszyńsko mowo
być zawsze do prawjynio gotowo
a jak cie uż żodyn nie bydzie rozumioł
to jyny wiater bydzie po naszymu szumioł"

Zachodni miana

Ze dwa tydnie tymu pisołech ło tym, że kiery sie wybiere do naszego Cieszyna to bydzie sie mu zdało, że przijechoł na jakómsi wielkóm wystawe rozmajtych wieców przidajnych ku budowie. I nima to ważne czy przyjedzie tu do nas łod Wiseł, Puńcowa, Biylska abo aji s ”Fajfyndorfu” to na każdej ceście nóndzie cosi dlo siebie. Aji w tym pochyniónym “FACHU” też kierysi przeduje jakómsi chemije dlo mulorzi i mu wubec to nie zawadzo, że tam kiejsi co inszego sie wyrobiało. Kapke dalij trefiymy na Spar Ekspress i jakómsi pizzeryje, kiere ze zadku majóm kónsek trownika do najyńcio na jakómsi inwestycyje. Jako na tym kónsku trownika i betónu mo kierysi co postawić tego nie wiym, ale na iste bydzie to chałupa w kierej bydóm zaś kszefcić “artykułami budowlanymi”. Możne lepszyj by było te “Mamma Mie” pociś dalij i zrobić wiyncyj placu dlo głodnych Czechów kierzi akurat uż sóm “unaveni po nakupie”. S tego coch sie wywiedzioł we komputrze to ta pizzeryja je rzóndzóno kansi s Polski abo ze świata i nima to nasz tu stela napad. Kapkem je mi luto, że tak wszecko trzeja małupować łod inkszych, bo nima możne coby nasi sami łod siebie nie prziszli na to. Po drugi strónie sóm dwiyrze do tej firmy handlowo-produkcyjnej “Wilczek”, kiero też sie gańbi tym że je tu stela i mianuje sie wielkimi literami jako Spar Ekspress. Nie wiym czy tyn czyrwióny szyld naganio im wiyncyj klijyntów, ale myślym se, że isto ni.A ta moda na zachodni miana je tu u nas tak wielko, że wszedcy tustelocy zapominajóm kaj sóm i je im to jedno jaki miano na chałupie powieszóm. Sóm też tacy jak dejmy na to ci co przedujóm nóm benzine abo rope i poradzom co chwilem inakszyj sie mianować.

Mini słownik:

wieca - rzeczy,

cesta - droga,

pochynióny - porzucony,

mulorz - murarz,

kapke - trochę,

kónsek - kawałek,

kszefcić - handlować,

pociś - popchnąć,

na iste - na pewno,

napad - pomysł,

dwiyrze - drzwi,

inkszy - inny,

luto - przykro,

miano - imię/nazwa,

kaj - gdzie.

Miyjcie sie wszedcy dobrze i wiesiołego popióntku!

Dzisiejszy tekst ma tytuł "Zachodni miana".