Przi niedzieliczce coby nie zapómnieć naszej rzeczy: Zaroz we winklu

”...wiynkszy kszeft s takimi samymi wiecami”. fot. FJD

”...kierysi postawił jakómsi czorno-pomarańczowóm chałupe...”. fot. FJD

SZPACYRKYM PO CIESZYNIE

"Moja ty słodko cieszyńsko mowo
być zawsze do prawjynio gotowo
a jak cie uż żodyn nie bydzie rozumioł
to jyny wiater bydzie po naszymu szumioł"

Zaroz we winklu

Tak se myślym kiery prziszeł na ty miana dlo tych cieszyńskich potoków? Czy to niebyło tak, że tyn kiery siedzioł kiejsi nad mapami i uwidzoił na ni krziwóm niebieskóm kryske napisoł tam miano od siedloka, kiery wedla tego potoka mioł rajczule. A możne, że było inakszyj? Gdo to dzisio wiy? S tymi potokami dómy se uż pokuj, bo dzisio pujdymy kapke do wyrchu po tej Stawowej, a tam uż żodnego potoka nima. Za to sóm tam jak wszyndzi w Cieszynie rozmajte kszefty. Piyrszy je tam kszeft s autami we placu na kierym też sóm rozmajte wieca ku budowie. To wubec ganc do siebie nie pasuje coby razym przedować piosek s autami, ale widać s tego, że żodnymu to nie zawadzo. To zresztóm nima taki piyrszy misz masz w Cieszynie i sie mi zdo, że to je nasz cieszyński szpecyjoł. Jesi jednakowóż nie trefiymy tam na to co je nóm przidajne przi budowie, to zaroz dalij je eszcze wiynkszy kszeft s takimi samymi wiecami. Jako łóni tak przi siebie egzystyjóm tego nie wiym, bo to przeca nima kszeft s bótami abo s szatami, kiere mogóm być rozmajte, a piosek abo cegła je wszyndzi tako samo. Na płocie i w postrzodku je tam isto ze dwacet chwolideł na kierych sie yno mogóm wyznać rozmajci fachmani i mulorze. Dalij sie uż iś nie do i muszymy szpacyrować spadki, bo ta Stawowo sie skóńczyła i trzeja przelyś na drugóm stróne cesty. Zaroz we winklu Stawowej i Biylski kierysi postawił jakómsi czorno-pomarańczowóm chałupe na kierej zaś yno przirażóne sóm jakisi angielski litery. Co to je w tych ludziach, że nie poradzóm ganc po ludzku cosi napisać o sobie yno fórt trzeja małupować wszecko co ciśnie sie tu do nas ze “Zachodu”.

Mini słownik:

kiery - ktoś,

uwidzioł - zobaczył,

rajczula - pastwisko,

siedlok - bogaty rolnik,

wedla - obok,

kapke - trochę,

wieca - rzeczy,

wubec - w ogóle,

trefić - spotkać,

przidajne - potrzebne,

kszeft - interes,

szaty - sukienki,

cesta - droga,

dwacet - dwadzieścia,

spadki - z powrotem,

winkiel - narożnik,

fórt - ciągle.

Tóż mjyjcie sie wszedcy dobrze i wiesiołej niedzieliczki.

Dzisiejszy tekst ma tytuł "Zaroz we winklu".