CO TYDZIYŃ PO NASZYMU: Aji farba na gelendry mostka trefiła sie nóm jakosi felerno

"...nie wym kiery to sztrajchowoł...". fot. FJD

"...dzisio je uż richtik strzybny...". fot. FJD

SZPACYRKYM PO CIESZYNIE

"Moja ty słodko cieszyńsko mowo
być zawsze do prawjynio gotowo
a jak cie uż żodyn nie bydzie rozumioł
to jyny wiater bydzie po naszymu szumioł"

Fest fijołkowy

Zeszły tygodziyń zapómniołech zadzierżeć sie przi tym nowym mostku co zakludzi nas do republiki. Sie mi zdo, że moc Cieszynioków było na odewrziciu tego mostka i isto pamiynto, że łón był fest fijołkowy. Dzisio uż je richtik strzybny, bo słóńce wypoliło tóm fijołkowóm barwe. Była to isto farba s promocyje i trzeja sie bydzie teraz tłumaczyć skyrs tego we Brukseli. Bo u nas co je nowe to stawio Europa i łóna też sie potym na to dziwo i kóntroluje, jako to zustało postawióne. Nie wiym, kiery to sztrajchowoł, bo je to mostek miyndzynarodowy, ale widać s tego, że isto to był jedyn malyrz. Możne, że przidzie sie ło to sóndzić we Europejskim Trybunale Sprawiedliwości i za jakisi czas sie dowiymy kaj i kiery prziszeł ku taki felernej farbie. Co to je za moda coby kaj sie yno do wieszać ty tabulki s tym modrym kolcym na kierym je dwanos gwiozdek i udować, że nic sie nie stało i nie sóm my uż taki boroki. Kiejsi za Franca Jozefa żodyn nie wieszoł na chałupach austryjackich tabulek i dzisio nie wiymy gdo ich postawił. Możne, że i dobrze, bo było by wadzynio na cały Cieszyn. Jo to jakosi nimogym wyrozumieć jaki kszeft na nas robi ta Unija Europejsko, bo przeca na świecie za darmo nic nima. Nie udało mi sie nigdy widzieć coby jakosi pieknie obleczóno paniczka s panoczkym szpacyrowali po ceście i wołali na biydoka coby ku nim prziszeł, to sie ś nim wszeckim czego sie dorobili za swojigo życio podzielóm. Jesi możne kansi sie cosi takigo przitrefiło to tym tuplym tyn biydok musioł to łodrobić i możne, że do dzisia u nich plac zamiato. Nasi chłapcy i dziywczynta uż to też trynujóm kansi tam w Europie, bo pojechali do lepszego świata jako borocy.

Mały słownik:

sie zadzierżeć - zatrzymać,

zakludzi - zaprowadzi,

na odewrziciu - na otwarciu,

skyrs - z powodu,

sztrajchowoł - malował,

modry - granatowy,

kszeft - interes,

kansi - gdzieś,

tym tuplym - podwójnie.

Mjyjcie sie wszedcy dobrze i wiesiołego popióntku.

Dzisiejszy tekst ma tytuł ”Fest fijołkowy".