CO TYDZIYŃ PO NASZYMU: Prowdziwe pinióndze

"...może przespać sie na strużoku...". fot. FJD

"...je osiedli Piastowski...". fot. FJD

SZPACYRKYM PO CIESZYNIE

"Moja ty słodko cieszyńsko mowo
być zawsze do prawjynio gotowo
a jak cie uż żodyn nie bydze rozumioł
to jyny wiater bydzie po naszymu szumioł"

S szachty "Morcinek"

Jak tak szpacyrujym po tym naszym Cieszynie to fórt rozmyślóm kaj idzie u nas zarobić prowdziwe pinióndze. Bo przeca nie zarobiajóm ich ludzie kierzi nóm usługujóm na wszelijaki przileżytości, ani to nie sóm urzyndniki s magistratu, ani też rozmajci dochtorzi. Wszedcy łóni majóm pinióndze łod tych ludzi kierzi robióm we werkach i za to co wyrobjóm a po tym przedajóm majóm prowdziwe pinióndze. Ś nimi potym dziepro lecóm do rozmajtych kszeftów, wsiadajóm do cugu, autobusa, idóm do dochtorów, abo kupióm se nowy ancug. Ale tych werków co idzie w nich ty pinióndze zarobić mómy dzisio dziesiyńć razy mjynij niż kiejsi, a cieszynioków isto fórt je tela samo jako bywało hańdownij. Na tej Motelowej co my łostatnio po ni szli idzie eszcze trefić na gospode w kierej możecie pojeś ale też umynczóny gość może przespać sie na strużoku. Jednakowóż nejbardziyj ni mogym wyrozumieć tego jejich miana “Restauracja Trzech Braci”, bo do tego miejsca kaj sie ci trze bracia spotkali je tak daleko, że fest ciepniynty kamiyń ani tam nie doleci. Za to przi tej studni kaj trefili sie ci trze bracio je gospoda co sie mianuje “U Czecha” i to ganc uż nie pasuje. A kapke niżyj je osiedli Piastowskie, w kierym hawiyrze s szachty ”Morcinek” kiejsi mieli dostować kwartyry. Uż aji jednóm ulice ochrzcili tam "Węgielną" ale nic to nie pumógło, bo znaszeł sie taki co tóm szachte kozoł zawrzić i nima go do dzisia gańba mianować sie Zaolziokym. Ludzie przeca prawióm, że matka to je ta co wychowo a nie ta co urodzi. Tak samo je s tym klukym co sie we wojne urodził na Zaolziu i miyszkoł tu s łojcami sztyry a pół roku i tela my go widzieli.

Mini słownik:

fórt - ciągle,

kaj - gdzie,

kierzi - którzy,

przileżytości - okoliczności,

werk - fabryka,

kszeft - biznes,

cug - pociąg,

ancug - ubranie,

kiejsi - kiedyś,

hańdownij - dawno,

stużok - siennik,

miano - nazwa,

fest - mocno,

ciepniynty - rzucony,

kwartyr - mieszkanie,

hawiyrz - górnik,

szachta - kopalnia,

gańba - wstyd,

kluk - chłopiec,

łojce - rodzice.

Mjyjcie sie wszedcy dobrze i wiesiołego popióntku.

Dzisio Wóm poczytóm po naszymu felieton “S szachty Morcinek”