CO TYDZIYŃ PO NASZYMU: Kiery wiy co to je tak naprowde to “sale”

...”Corso” s firmy Julius Meinl s Wiydnia

...normalnie pisze fryzjer...

...wiszom rozmajte bótki...

...trefiymy na zdjyńciorza...

"Moja ty słodko cieszyńsko mowo

zawsze do prawjynio gotowo

jak cie uż żodyn nie bydzie rozumioł

jyny wiater bydzie po naszymu szumioł"

POZÓR! Kiery nimo chynci tego czytać, abo kansi wraził łokulory, abo mo moc roboty i łoczy go bolóm to se może tego posłóchać jak prziciśnie ”kursywom” na tóm czornóm szczałke w tej szarej kostce, kierom nóndzie zaroz pod spodkym.

Fórt odewrzite

Coby przi czytaniu tego felietónu zachycić kaj my dzisio sóm to powiym wóm, że wedla cukierni łod pana Oczadłego.Kumu zaś to zawadzało, coby przechrzcić jóm na jakisi “Corso” s firmy Julius Meinl s Wiydnia tego nie wiym, ale isto rozchodzi sie ło to, coby kómusi zaszpanować. Czy to wszecko dycki musi być u nas cudze i udować jacy to my sóm nowocześni Europeiczycy ? A ciastka lody i inksze słodkości i tak sóm rychtowane rynkami tusteloków i żodyn tego przeca nie obsztelowywuje we Wiydniu. Hańdownij chodzili my do “Wenecji”, kieróm miała we swoji starości familija Ondrzejków i wszedcy wiedzieli, że jejich ciastka i lody to nie sóm żodne cudze wieca. Kapke dalij widać na trotuarze postawiony gesztel, na kierym wiszóm rozmajte bótki. Je to yno jedna wiec, kiero nóm prawi ło tym, że w postrzodku trefiymy na to somo, a ni na jakisi “sale”. Bo takóm sale to yno dzisio idzie najóńć możne w Dómu Narodowym abo w jakisikej szkole i to eszcze yno wtedy, jak dziecka tym padym ni majóm gimnastyki. Zaroz dwiyrze dalij, kiere som fórt odewrzite do korzónt w siyni idzie spozdzrzić tabule na kierej ganc normalnie pisze fryzjer i nima tam żodnych łozdobników, dejmy na to salón czy jakisi gabinet. Ku tymu też nima ich gańba napisać wiela to strzigani u nich stoji.Jak sie nóm podarzi pieknie ostrzigać to zaroz trefiymy na zdjyńciorza u kierego se idzie strzelić fotke, a ku tymu aji dać se zrobić zdjyńcia s orlapu. Coby dalij fórt szpacyrować po tym samym trotuarze muszymy sezlyś po schódkach,przelyś przez ulicem Browarnóm i zastawić sie przed downym hotelym a po wojnie dómym towarowym.

Mini słownik:
zachycić- załapać,
wedla-obok,
dycki-zawsze,
obsztelowywuje-zamawia,
wieca-rzeczy,
prawi-mówi,
tym padym-w tym czasie,
fórt-ciągle,
do korzónt- na oścież,
ganc- całkiem,
gańba-wstyd,
sezlyś-zejść,

Tóż miyjcie sie wszedcy dobrze i wiesiolego popióntku