CO TYDZIYŃ PO NASZYMU: Pedajlować po cestach w Cieszynie to je łopowoga

...widać wielki “Prince Polo

...a nad dwiyrzami “Telefony komórkowe

"Moja ty słodko cieszyńsko mowo
być zawsze do prawjynio gotowo
a jak cie uż żodyn nie bydzie rozumioł
to jyny wiater bydzie po naszymu szumioł"
POZÓR! Kiery nimo chynci tego czytać, abo kansi wraził łokulory, abo mo moc roboty i łoczy go bolóm to se może tego posłóchać jak prziciśnie ”kursywom” na tóm czornóm szczałke w tej szarej kostce, kierom nóndzie zaroz pod spodkym.

Pudliczko s waflami

Naroz znaszli my sie w Nowym Roku i ani sie żodyn nie obezdrził, a uż mómy zaś z przodku dwanos miesiyncy do drepszynio po Cieszynie. Isto to pudzie tyn tydziyń bolawie, bo kapke śniega nasuło i trzeja bydzie dować pozór, coby na rzić nie ukielznóć. Dzisio znaszli my sie przed takim krzeftym co przeduje bótki i “Tarasek” sie mianuje. Na szyldzie mo napisane 1990 i nie wiym czy sie w tej dacie rodził czy też uż kszefci tam tak dłógo i łod tego roku zacznył przedować bótki. Żodnego to isto nie obchodzi, bo przeca rozchodzi sie ło to, coby se kupić taki bótki, kiere by nie gniótły i nie robiły nóm plynskiyrzi. Przed dwiyrzami postawił gesztel na trzi koła, coby możne aji szło tam do nich przipedajlować. Uż tu mómy całóm gymbóm w Cieszynie Europe, ale chybio eszcze wyłoślynio po kierej stronie Głymboki na tych kołach lepszyj jeździć, coby nie wderzić do jakigosi auta. Zaroz za murkym je kszeft, kiery nie wim co tak naprowde przedowo, bo za szybóm łod auslagi widać wielki “Prince Polo”, a nad dwiyrzami “Telofony komórkowe”. Dlo lufciorzi, kierzi przijadóm do Cieszyna, a nigdy rychlij ni mieli w gymbie naszego prince pola to na iste piyrsze kupióm ty telefony niż ty wafle. Chocioż możne je to tam tak wyszpekulyrowane, że jak gdo kupi telefon to dostanie ku tymu s darma pudliczko s waflami, a jak kupi wafle to dostanie ku tymu też s darma jakisi tańszy telefón.Idzie też tam u nich cosi dostać na spłaty, bo przeca nie każdego dzisio stać, coby se kupić telefón razym s waflami, za jednóm wypłate.

Mini słownik:
obezdrził- obejrzał,
dwanos- dwanaście,
drepsić- człapać,
bolawie- ciężko,
kapke- trochę,
rzić- tyłek,
ukielznóć- pośliznąć,
kszeft- sklep,
plynskiyrz- odcisk,
gesztel- stojak,
koło- rower,
wderzić- zderzyć,
rychlij- szybciej,
lufciorz- wczasowicz,
na iste- na pewno,
spłaty- raty,

Tóż miyjcie sie wszedcy dobrze i wiesiołego popióntku