CO TYDZIYŃ PO NASZYMU: Kustowani w gospodzie to je drogi szpas

tu idzie uwidzieć s fróntu te gospode kiero “MASKA” sie mianuje, fot. JFD

ulicze Równóm i Spacerowóm żodnymu nie przidzie do czepaniI...” fot. JFD

POZÓR! Kiery nimo chynci tego czytać, abo kansi wraził łokulory, abo mo moc roboty i łoczy go bolóm to se może tego posłóchać jak prziciśnie ”kursywom” na tóm czornóm szczałke w tej szarej kostce, kierom nóndzie zaroz pod spodkym.

SPOŁEM I DOPIERO WSTOŁEM

Dalij ku Puńcowu uż nima bardzo co łoglóndać, bo chałupy sóm w zogródkach, a żodnego kszeftu wedla nich nima. Po ceście minymy dwie ulice, kierych miana na iste sie obstojóm chocioż niewiadomo gdo i kiedy by w ratuszu rzóndził. Bo przeca ulice równóm ani spacerowóm żodnymu nie przidzie do czepani przechrzcić na co inkszego. Tak czy inakszyj trzeja bydzie sie zwyrtnóć i spadki wlyź na ulicem Tomanka na kierej cosi sie przeca możne podarzi Uwidzieć. Na krziżowaczce s ulicóm Śniegónia i Tómanka idzie uwidzieć s frontu te gospode kiero “MASKA” sie mianuje. Fórt jednakowóż ni mogym prziś na to skyrs czymu taki miano kierysi ji wynaszeł. Na łokapie mo taki szyld na kierym som wymalowane taki gymby masek podobne do tych, kiere naździywajóm na czepanie italijańcy na festiwalu w Wenecyji. Możne, że to miano by bardziyj pasowało w jakisikej gospodzie na przikopie, kieróm cieszyniocy wenecyjóm nazywajóm. Nie bydym żodnymu rozporzóndzoł jako se mo swój kszeft mianować, bo to je jejich problym, ale poradzić kómusi nigdy to nima grzych. S jejich szyldu eszcze sie idzie wywiedzieć, że u nich kustujóm sie rosmajte ważne kszefty w Cieszynie, kiere na tym szyldzie sóm zmianowane. Kónsek dalij je żółto-pamereńczowy kszeft, kiery nazywo sie pawilónym Handlowym i chwała im za to, że nima Łón żodnym marketym. Po polsku też idzie poczytać, że patrónym tego kszeftu je “SPOŁEM” co kiejsi kabareciorz laskowik za socjalistycznych czasów i śnich srandowoł, że “społem i dopiero wstołem”. Dzisio uż nima gróntu ś nich srandować, bo wszecki jejich kszefty w Cieszynie sóm po wyrchu pieknie opucowane, a w postrzodku majóm towor wszelijaki.

Mini słownik:

Tóż mjyjcie się wszedcy dobrze i wesołego popióntku!

felieton pt.:”SPOŁEM I DOPIERO WSTOŁEM”