CO TYDZIYŃ PO NASZYMU: Tym plechym co je na tych znakach, to szło by isto przikryć całóm stodołem

”...trzinos znaków drogowych...”

"Moja ty słodko cieszyńsko mowo
być zawsze do prawjynio gotowo
a jak cie uż żodyn nie bydzie rozumioł
to jyny wiater bydzie po naszymu szumioł"

POZÓR! Kiery nimo chynci tego czytać, abo kansi wraził łokulory, abo mo moc roboty i łoczy go bolóm to se może tego posłóchać jak prziciśnie ”kursywom” na tóm czornóm szczałke w tej szarej kostce, kierom nóndzie zaroz pod spodkym.

Sóm prziszfajsowane
Sóm rozmajci u nas tustelocy, kierzi plyntóm sie po cieszyńskich cestach. Jedni wubec nie dziwajóm sie doopkoła siebie, bo abo gzujóm wartko do roboty, abo szczynśliwi walóm po ni ku chałupie. Je też moc takich posuniónych w rokach, co sóm kapke zegnióni w krziżach i dziwajóm sie yno na ziym, coby ło nic nie zakopnóć. Ani jedni ani drudzy isto do dzisia nie spozdrzili tych trzinos znaków drogowych za sztrekóm i przed cestowym kolcym na Zamkowej. Je tam zdelka nie wiynkszo niż s pińdziesiónt metrów przi kierej idzie uwidzieć po łobu strónach aże osim zieleźnych rułek, kiere sóm prziszfajsowane do gelendry na moście, kiery je przeciepany przez naszóm Bobrówke. Jo też dłógo bych na tóm drogowóm atrakcyje nie prziszeł, aż dziepro jak chyciła mie roz szudera i musiołech sie schrónić pod daszkym kiosku kiery hańdownij Ruchym sie mianwoł. Tak to dycki je jak człowiek je fest rozegnany i cosi go sztopnie to mo ostude co s tym czasym zrobić, kiery dostoł naroz z darma. Po jednej strónie za sztrekóm jak jadymy ku Frysztacki ci co majom we starości wszecki cesty w Cieszynie to se isto myślóm, że jak kiery jedzie, to bydzie w stanie uwidzieć ty wszecki znaki, kiere tam przirazili na tych zieleźnych rułkach. To sie yno może podarzić tym, kierzi naroz trefili na zawrzite rampy, jak jedzie cug do Frydku –Mistku, w kierym żodyn nigdy nie siedzi. Czymu tyn cug telkowne razy dziynnie jeździ tam a spadki tego nie wiym, ale je to możne tymu zrobióne, coby banty przi tych rampach nie zar-zowiały i byłyby dycki przirychtowane do zawrzicio.

Mini słownik:
plyntóm-wałęsają się,
cesta-droga,
wubec-w ogóle,
gzujóm-pędzą,
kapke-trochę,
zegnióni-zgięci,
dziwajóm sie- patrzą się,
isto-pewnie,
spozdrzili-zobaczyli,
sztreka-tory,
cestowe kolco-rondo,
prziszfajsowane-przyspawane,
gelendry-poręcze,
przeciepany-przerzucony,
dziepro dopiero,
szudera-ulewa,
sztopnie-zatrzyma,
przyrazili-umocowali,
zawrzite-zamknięte,
spadki-z powrotem,
rampy-szlabany,
banty-zawiasy,
cug-pociąg,
dycki-zawsze

Tóż miyjcie sie wszedcy dobrze i wiesiołego popióntku.