CO TYDZIYŃ PO NASZYMU: Przed Godami tustelocy glancujóm co sie yno do

”...je taki zmazany...”

Przed Godami, każdy glancuje co sie yno do, coby jak przydzie cało familija s nawszczywóm było widać, że robota nie poszła na marne. Nie wszedcy jadnakowóż to majóm ze zadku głowy i moc eszcze je takich, co nie skludzóm nigdy swojigo marasu i nie wykartaczujóm delin. Jak to eszcze je w postrzodku i tego nie widać to pół biydy, ale gorsze jak taki maras, charapuci i insze ździorba poniewiyrajóm sie po polu. Czasym styknie łapnóć do gorści jakisi ryżok, abo inszóm mietłe i kapke łomiyś ściane na swoji chałupie. Gorsze je to, jak ta chałupa ni ma naszo i po tym ni ma pana, coby s tym glancowanim prziś do porzóndku. Dejmy na to, tako ściana Domu Narodowego łod ulice Jana Matejki na prociw poczty, je tak zmazano, że je to gańba dlo tych co eszcze do dzisia tym dómym regirujóm. Stykło by yno to łomiyś mietlóm na takim delszym sztylu i uż by to było piekniejsze. Jak sie tej ścianie tak dorze przizdrzić, to idzie uwidzić, że je tam taki kulaty wyfuk, przez kiery isto żynie jakisi wrzawy luft i skyrs tego tyn puc na tej ścianie je taki zmazany. Inszo wiec kiero sie eszcze ciepie na łoczy to ty dociyrne gołymbie, kiere fórt świnióm na tym pieknym naszym rynku. Cosi sie jednakowóż tym gołymbióm w głowach pomiyniało, bo idzie teraz uwidzieć, że sfurkły s Floryjana i cosi fórt dziubióm wedla dwiyrzi rotuza. Bezmała dziubióm tam ryż, kierym suje sie dzisio na młoduche i żynicha jak wyndóm na pole przed rotuz, po załobrónczkowaniu. Uż dzisio ty gołymbie sóm móndrzejsze łod tusteloków, bo prugujóm futrować sie jedzynim, kiere możne za porem roków bydzie na talyrzach we wszeckich gospodach w Cieszynie

Mini słownik: Gody-święta, glancować-czyścić do połysku, familija-rodzina, nawszczywa-odwiedziny, skludzić-uprzątnąć, maras-nieczystości, wykartaczować-wyszczotkować, charapuci-graty, ździorba-niepotrzebne rzeczy, ryżok-szczotka, dociyrne-dokuczliwe, zmazano-brudna, gańba-wstyd, sztyl-trzonek, kulaty-okrągły, wyfuk-wydech, żynie-gna, luft-poietrze, fórt-ciągle, sfurknyły-zfrunęły, bezmała-podobno, młoducha-panna młoda, żynich-pan młody, futrować-karmić.

Tóż miyjcie sie wszedcy dobrze i wiesiołych Godów