CO TYDZIYŃ PO NASZYMU: Zowiść to je szpatno wiec

Dzisio zaś bydzie o poru rozmajtych wiecach, na kiere żech trefi zeszły tygodziyń. Zacznym łod zowiści, kiero sie mi ciepła na łoczy na placu za starostwym. Kiejsi w sobotem i niedzielem szło na “jejich” placu postawić se auto, a teraz jakisi zowistny urzyndnik zawrził tóm rampe i skóńczyło sie parkowani. Ludzie poradzóm jedym drugimu wszeckigo zowiścić, a nikierzi to majóm isto aji we krwie. Bo cóż to kómu zawadzało, abo kómu by czegosi ubyło powolić s autym se tam stanóć. Ani by przeca tego asfaltu nie zgumowoł, ani skyrs tego w sobotem nawszczywników Kauflandowi by na zicher nie ubyło. Możne, że to sie tak stało, skyrs tych nowych szurych biołych sztrajfek, kiere na tym placu zeszły tydziyń pomalowali. Isto sie im zdało, że tusteloki sie miyndzy tymi sztrajfkami nie pomieszczóm, bo nie dostali łod żodnego eszcze żodnej insztrukcyji. Wlazło by tam, tak na łoko s pińdziesiónt aucisków, kiere by jakisi czas tam stoły i nie wydychałyby tego smrodu do luftu. Zaś kolejorze, chycili sie przeca sprawowanio tego przejazdu na ceście, kiero sie Zamkowóm mianuje. Wybrali wedla tej sztreki ziymi aże do gróntów, bo isto prziszli na to, że przez te sztreke nie jeżdżóm yno same charczki, ale czasym nikiedy aji TIRY, kiere te ceste dorampowały. Skyrs tego porem dni nie dało sie tam przejechać i dostać na Frysztackóm, ale szło to objechać kolem elektrowni i lodowiska. Jak kiery tam sie w tym czasie szmatłoł to na na sicher spozdrził tam rozmajte bagry i inksze maszyny, kiere kolejorze dzisio majóm. Jedyn bager mioł aji gumiane i zieleźne koła, coby móg se jeździć po sztrece, a nieskorzij aji po cestach.

Mini słownik: wieca - rzeczy, ciepła - rzuciła, zawrził - zamknął, rampa - szlaban, krwie - krew, powolić - pozwolić, skyrs - z powodu, nawszczywnik - gość, na zicher - na pewno, szure - ukośne, sztrajfka - kreska, isto - pewnie, wlazło - weszło, cesta - droga, wedla - obok, sztreka - tor, charczki - bidule, doramplowały - zniszczyły, szmatłoł - chodził, bagry - koparki.

Mjyjcie sie wszedcy dobrze i wiesiołego popióntku.