CO TYDZIYŃ PO NASZYMU: To isto prziszło skónsi s Ameryki, coby kuchynie kupować na zdelke

”meble aże kansi s ulice Hallera...”. fot. FJD

”...nowe stare auto”. fot. FJD

SZPACYRKYM PO CIESZYNIE

"Moja ty słodko cieszyńsko mowo
być zawsze do prawjynio gotowo
a jak cie uż żodyn nie bydzie rozumioł
to jyny wiater bydzie po naszymu szumioł"

POZÓR! Kiery nimo chynci tego czytać, abo kansi wraził łokulory, abo mo moc roboty i łoczy go bolóm to se może tego posłóchać jak prziciśnie ”kursywom” na tóm czornóm szczałke w tej szarej kostce, kierom nóndzie zaroz pod spodkym.

Na zdelke

Podziwejcie sie ludzie co to sie dzisio porobiło, że aji kuchynie idzie na metry kupować. Kiejsi trzeja se było obsztelować rozmajte małe szranki i inksze kuchyniowe meble na sztuki, potym na miare, a dzisio,coby eszcze isto było rychlij to na zdelke. Jak dłógo eszcze bydóm trwać ty meblowe przedbiyżki tego nie wiym, ale w postrzodku miasta co chwila widać nowe chwolidło, kiere aji Czechóm zwyrto w czepaniach. Sóm żech je zwiedawy, kiery kszeft je na wyrchu, a kiery uż ledwie dyszy i kómbinujóm, coby go na dobre roz dwa zawrzić. Jak bymy sie tak przeszli po chałupach na Zaolziu to isto aże we Ostrawie trefilbymy na kuchynie przismyczóne s Cieszyna. Za tym kszeftym jak pujdymy fórt po prawej strónie cesty ku Hażlachu to nie do sie uwidzieć chwolidła, kiere zachwolo nóm meble aże kansi s ulice Hallera. Kiejsi mi gdosi prawił, że je to kszeft, kiery przedbiygła Biedrónka i zamias jedzynio przedowajóm tam dzisio inksze wieca na kierych nie poradzóm zrobić kszeftu. Na prociw po drugi strónie cesty gdosi w zogródce przeduje auta ze zagranicy, bo tak pisze na jego szyldzie. Nie wiym jako to robi i czy mo na tym jakisi kszeft, bo fórt tam je zawrzite i żodnych ludzi tam nima. Je to dlo mie jakisi dziwoki, bo wszecki inksze taki podobne kszefty majóm u sie budkem w kierej chocioż idzie na chwilem przisiednóć, napisać umowem, nó i przeca kansi niechać pinióndze za kupióne nowe stare auto. Nie rachowołech tych aut, ale tak na łoko je ich tam wiyncyj jako dwacet i na was czakajóm.

Mini słownik:

podziwejcie sie - popatrzcie,

kuchyń - kuchnia,

szranki - szafki,

zdelka - długość,

przedbiyżki - wyścigi,

chwolidło - reklama,

zawrzić - zamknąć,

czepań - głowa,

zwiedawy - ciekawy,

fórt - ciągle,

kszeft - sklep,

kansizawrzite - zamknięte,

dziwoki - śmieszne.

Miyjcie sie wszedcy dobrze i wiesiołego popióntku!

Dzisiejszy tekst ma tytuł "Na zdelke".