CO TYDZIYŃ PO NASZYMU: Prziszrubować idzie każdy szyld

"...mo gzycht jak by sie wczora skóńczyła wojna...". fot. FJD

"...wachuje tego banhofu coby na niego nie wiechało Pendolino". fot. FJD

POZÓR! Kiery nimo chynci tego czytać, abo kansi wraził łokulory, abo mo moc roboty i łoczy go bolóm to se może tego posłóchać jak prziciśnie ”kursywom” na tóm czornóm szczałke w tej szarej kostce, kierom nóndzie zaroz pod spodkym.

Łoba kościółki uż mómy za sobóm i dzisio bydymy sie dalij rozglóndać po tych Marlkowicach. Zaroz po lewo idzie uwidzieć “Lakme”, kiero tej swoji starszej siostrze pokozała jako to wyszpekulyrować, coby nie dać sie przedać i dować do dzisia ludzióm robotem. I tak tyn co kiejsi był wiynkszy je coros miynszy a tyn drugi na łopak i jak tak dalij pudzie to ty kiejsi wielki “Lakiery” kupi ta miynszo “Lakma”. I to by było dziepro do śmiychu, bo na iste tustelokóm by sie to podobało i zaroz poradzili by ty amerykański szyldy s lakierowskigo laboratoryjum ściepać i prziszrubować nasze. Kapke dalij łod cesty je marklowicki banhof, abo jak to na dzisio raczyj wyglóndo je to yno przistanek, kiery mo gzycht jakby sie wczora skóńczyła wojna. Wszyndzi na całym świecie każdo nowo władza wieszo swoji szyldy kaj popadnie, coby ludziska wiedzieli kaj sóm, jak rano odewrzóm łoczy. Tóż też na tej łodropanej ścianie tego niby banhofu, kierysi znaszeł plac na nowy szyld CIESZYN MARKLOWICE, a je łón taki wielki i bieluśki, że widać go isto aże po cimoku. Nad nim wiszóm dwa herby, kiere jak widać uż nie jedno widziały. Tyn cieszyński je eszcze jaki taki, ale tyn polski oreł uż nimo wiela ducha w sobie. Zaś plech do kierego je prziszrubowany je tak zardzowiały, że udowo czyrwónóm farbem. Ciynżko też mi było sie dochledać na jego głowie koróny i nie wiym czy mu spadła czy zapómnieli jóm namalować. Po kwiotkach, kiere wiszóm nad tym szyldym i antynie łod telewizora widać, że kierysi tam eszcze egzystuje i możne wachuje tego banhofu, coby na niego nie wiechało żodne Pendolino.

Mini słownik: