CO TYDZIYŃ PO NASZYMU: Porzykać sie dycki do byle kaj, jak yno mo sie chyńćbyć zawsze do prawjynio gotowo a jak cie uż żodyn nie bydzie rozumioł to jyny wiater bydzie po naszymu szumioł" To dycki to je taki posmolóne, jak sie kómusi do postawić cosi, a łón ni ma tu stela. Rozchodzi sie ło tych macherów, kierzi stawiajóm te nowóm sztreke ku Goleszowu i dziwajóm sie yno na plany, kiere majóm przed łoczami. Bo podziwejcie sie ludziska, czy je to możne, coby taki jedyn z drugim sie nie kapnył, jak tyn cug ku Goleszowu zacznie rajzować to ty rampy na Bobrecki bydóm wiecznie zawrzite. Kiejsi jak eszcze nie było tego modernego wiadukta, to pod sztrekóm była tako mało dziura-tunelik, przez kiery szło przelyź na drugóm strónem cesty. Jak cugi przestały jeździć ku Goleszowu bo sztreka zarzowiała, to kierysi prziszeł na to, coby te dzire takim wielkim s łobu strón plechym zatkać. Dzisio, jak cugi zaś spadki dostowajóm drugi życi, to trzeja było yny te dziure wyporzóndzić i byłoby to taki porynczne, jak kiejsi. Czegosi tu se nie wszymóm, bo rozmajte stare chałupy i insze stare wieca dycki sie na nowo sztrajchuje, coby młodzi ludzie wiedzieli jako to kiejsi nasi starzicy i przibuzni żyli. Nie rozumjym też tego, że przeca dycki je tela wrzasku ło każdóm wiec, kiero mo wiyncyj niż pińdziesiónt roków, a ta dziura pod tóm sztrekóm na zicher była starszo. Całe szczynści, że sie smiłowali nad tóm kapliczkóm, kiero tam przed tóm sztrekóm stoji i jóm nie obalili, bo isto sie im zrobiło ji luto. A możne też tymu jóm niechali, bo jak tak tustelocy bydóm stoć dłógo przed tymi rampami, to nóndóm czas coby se przi ni porzykać. Uż to widzym jak tam zaroz jakisi farosz postawi kiśniczke na piniódze, kieróm bydóm musieli wachować miastowi wachtyrze, coby ji kiery nie gwizdnył. Mini słownik: dycki - zawsze, posmolóne - nie wydarzone, sztreka - tory, dziwajóm - patrzą, nie kapnył - nie zorientował, cug - pociąg, rajzować - podróżować, rampy - szlabany, zawrzite - zamknięte, kiejsi - kiedyś, cesta - droga, prziszeł na to - wpadł na to, plech - blacha, wyporzóndzić - wysprzątać, wszymać - rozumieć, wieca - rzeczy, sztrajchuje - maluje, starzicy - dziadkowie, przibuzni - krewni, na zicher - na pewno, obalili - zburzyli, luto - przykro, porzykać - pomodlić, farosz - proboszcz, kiśniczka - pudełko, wachować - pilnować, wachtyrze - strażnicy. Tóż miyjcie sie wszedcy dobrze i wiesiołego popióntku.
|
reklama
|
Dodaj komentarz