CO TYDZIYŃ PO NASZYMU: Kiejsi chrzcili my yno dziecka, a dzisio chrzci sie bele co

Fórt jednakowóż cosi je do pisanio, bo ni ma dnia, coby gdosi cosi nie wynokwił. Nie wiym czy wiycie, ale zeszły tydziyń uż sie podarziło ściepać szalunki s tego betónowego muru na Frysztacki i kierysi prziszeł na to, coby na nim roztrzaskać flaszke s kwitym. To miało być isto ganc taki same jak chrzci sie rozmajte szyfy, kiere uż sóm fertig i bydóm nieskorzij pływać po wodzie. Insze wieca, kiere jak sóm fertig, to sie ich też próguje czy wydzierżóm wszecko to, do czego majóm słóżyć. I dejmy na to, taki most jak sie go chce odewrzić i uż je fertig, to po nim jadóm wielki auciska ze ze skolim, a pod nim stojóm ci, co go postawili i ci co łónego na papiórze narysowali. Je to też po to, jakby tyn most na nich zgruszoł, coby uż wiyncyj nic nie stawiali ze szkodóm dlo inszych ludzi. Tak rozmyślóm jako i gdo bydzie prugowoł tyn mur, coby sie nie obalił i żodnego nie ukrziwdził, bo przeca ta flaszka, kieróm na nim roztrzaskali ni może być żodnóm gwarancyjóm. Możne, że jakisi czas to wydzierży, bo uż tyn tydziyń w pyndziałek prziszła tako wielko szudera i go nie zmyło, chocioż porem godzin wedla niego żynyła, a nieskorzij aji stoła tam prawie po kolana woda. Isto żodyn tego se nie wszymnył, że jak zaasfaltujóm te całóm cestem, to woda nie bydzie miała kaj uciyc i bydzie ś nióm łostuda. Możne, że isto eszcze nie odetkali tych ruł, kierymi dycki kiejsi ta deszczówka do Bobrówk żynyła. Kiejsi tako jedna wysoko kształcóno paniczka rzekła: "taki mómy przeca klimat", że roz padze, a po drugi świyci słońce, ale jakosi fórt ludzióm, to ni może ulegnóć sie w czepaniach.

Mini słownik: fórt - stale, gdosi - ktoś, wynokwił - wymyślił, ściepać - zrzucić, kwit - wódka, ganc - całkiem, szyfy - statki, fertig - gotowe, wieca - rzeczy, skoli - kamienie, zgruszoł - spadł, szudera - ulewa, wedla - obok, żynyła - gnała, wszymnył - myślał, cesta - droga, ruła - rura, dycki - zawsze, czepóń - głowa.

Tóż miyjce sie wszedcy dobrze i wiesiołego popióntku