CO TYDZIYŃ PO NASZYMU: Ta gupio moda  roz dwa wypróżni szrajtofle każdej paniczce

...kiero mianje sie “Triumph

...robióm likwidacyje kolekcyji...

Likwidować lajbiki

Kapke sie zrobiło cieplij, cesty obeschły, śniyg stajoł i widać, że idzie ku wiośnie. Skyrs tego poradzymy uż dzisio szpacyrować suchóm nogóm po Głymboki i dziwać sie na ty wszecki pieknie opucowane chałupy. Zastawiymy sie dzisio przi chałupie s nomerym trzicet siedym w kierej znaszeł se swój plac godzinkosz. Po wyrchu dwiyrze przez kiere sie do niego wlazuje sóm bardzo piekne i aż człowiekowi przichodzi chyńć wlyś tam do postrzodka. Za szybóm we dwiyrzach przyrażóno je kartka s kierej sie idzie wywiedzieć, że przi sprawowaniu godzinek możecie sie też pozbyć pinindzy za naładowani komórki. Kónsek dalij idzie zaś trefić na lajbikownie, kiero sie mianuje “Triumph” i tak jak moc inkszych kszeftów w Cieszynie je cudzo, bo swojóm dyrekcyje mo we Szwajcaryji. Za auslagóm wywiesili wielkimi drukowanymi literami informacyje, że robióm przecyne, a kapke niżyj na inkszej kartce pisze, że robóm likwidacyje kolekcyji s łóńskigo roku. Jo jako chłop ni mogym tego wyrozumieć po co likwidować lajbiki kierych i tak żodyn nie widzi, bo paniczki noszóm to pod szatami i moda nimo tu nic do rzeczy. Sie mi zdo, że lajbiki majóm być yno wygodne, coby sie ramiónczka nie wrzinały do ciała. Chocioż może je to tak czego chłopi nie rozumióm, że to co nie widać też musi mieć szpecyjalnóm barwe i szyci, wedla aktualnej mody. Krzefciorzóm rozchodzi sie ło to, coby eszcze dobry lajbik s łóńskigo roku wyciepać do hasioka i dać sie nacióngnóć na kupiyni modnego.

Mini słownik:
kapke-trochę,
cesta-droga,
skyrs- z powodu,
dziwać sie-patrzeć,
opucowane-otynkowane,
godzinkorz-zegarmistrz,
dwiyrze-drzwi,
przyrażóno-przytwierdzona,
godzinki-zegarki,
kónsek- kawałek,
lajbik-biustonosz,
auslga-wystawa,
szyci-krój,
wieca-rzeczy,
hasiok-śmietnik

Tóż miyjcie sie wszedcy dobrze i wiesiołego popióntku