CO TYDZIYŃ PO NASZYMU: Tak kiejsi było, że do roboty trzeja było namowiać aji cudzych ludzi

”...Dopisane przy CELMIE “indukta”...”. fot. FJD

”...za ponióndze kozać stować naszym autóm”. fot. FJD

Trzeja rzeknóć, że to przeciepani tej Wytwórni Laków do Marklowic dobrze sie Cieszynowi podarziło skyrs tego, że moc ludzi dostało robote. Był to czas, że we wszeckich cieszyńskich werkach brakowało ludzi do roboty i jeździlimy po całej Polsce, coby chocioż kapke tych ludzi namówić do roboty w naszym Cieszynie. Tak sie czasy zmiyniły i dzisio żodyn Anglik, Niymiec ani Italianiec do nas nie przijyżdżo i nie namowio naszych młodzioków do roboty, bo łóni sami wiedzóm kaj jechać, coby jakisi porzóndny grosz zarobić. Teraz nima ani roboty dlo ludzi tu stela a co dziepiyro dlo tych co my ich kiejsi namowiali, coby sie tu do nas przekludzili. Tymu też nimogym wyrozumieć skyrs czymu zaś zostoł wybrany do PE tyn gość z Wodzisłowio co to kiejsi prawie wszecki nasze werki poprzedowoł a potym sie zebroł tu stela i tela my go widzieli. I teraz uż nóm yny zutało podpiyrani sie na starych dobrych markach, o kierych kiejsi w całych demoludach dobrze rzóndzili. Tymu też isto dzisio mogymy uwidzieć na tej wyrychtowanej ścianie po Wytwórni Laków wielki szyld “JUWENIA” a pod nim maluśkimi literkami dopisane “nowa”. Tak samo je cosi dopisane przi naszej zasłóżónej CELMIE i nazywo sie to “indukta” i widać, że żodnego dzisio za to nima gańba. Skyrs tego czymu aji taki porzóndny werk uż nie robi tych motorów dlo kómbajnów co kopjóm wóngiel ani tych maluśkich kiere wrażowali do meleksów tego nie wiym, ale dziw biere, że kiejsi za socjalizmu sie godziły aji Amerykańcóm, a teraz nie chcóm ani ło nich słyszeć. Zaroz wedla tej nowej Juwenii cosi zustało rozbulane i urzyndniki z magistratu prziszli na to, coby w tym plosie za pinióndze kozać tam stować naszym autóm.

Mini słownik: