Przi niedzieliczce coby nie zapómnieć naszej rzeczy: Bez żodnej flinty”...po ścianach tych chałup jeździć łoczami...”. fot. FJD ”...s pomiyndzy liści wyzyzuje maluśki szyldek...”. fot. FJD być zawsze do prawjynio gotowo a jak cie uż żodyn nie bydzie rozumioł to jyny wiater bydzie po naszymu szumioł" Dzisio skryncymy w Młńskóm Brame i zaś jak co tygodziyń bydymy sie uwzimać nad tymi chałupami, kiere sóm poobwieszane wszelijakimi chwolidłami. Na nikierych ścianach sóm łóne tak wielki, a ku tymu eszcze naszkryfane po czesku, że idzie ich aji poczytać s poza Olzy. Tym wszeckim co to ty chwolidła wieszajóm trefiło sie cosi jak ślepej kurze zorko, bo klynkła “Juwenia” i dzisio nie trzeja sie uż żodnego nic pytać yno wszecko wieszać. Nie wiym czy ta Juwenia eszcze egzystuje, bo s pomiyndzy liści wyzyzuje taki maluśki szyldek, kiery jakby go przirownać do inszych je ze sto razy mjynszy. Ale nejbardziyj zaimawe je to,że kiery by chcioł sie ”soukromie” prywatnie uczyć czeskigo to nie potrzebuje kupować żodnego szlabikorza yny starczy każde rano stanóć przi Olzie i po ścianach tych chałup kiere tam stojóm jeździć łoczami. I podziwejcie sie na co nóm prziszło, że Czesi bez żodnej flinty uż tak tyn nasz Cieszyn uchycili, że ani sie nie spozdrzymy, a zaś bydóm kole Skoczowa tak samo jako sie im to podarziło w dewatnostym roku. Bo jak by tak jakisi Warszawiok wysiod na banhofie w Czeskim Cieszynie i przeszeł przez Olze to by nie wiedzioł kaj je. Dziepro możne kapke dalij ku rynku uwidzioł by wiyncyj polskich szyldów, ale i to ni ma iste bo co drugi i tak je napisany po angielsku. My zawsze sóm po zadku i nie poradzymy cosi pomyśleć do przodku, a potym jak uż je nieskoro to nie rachujymy sie ani ze życim jyno robiymy wszecko coby wrogów przeganiać s naszej ziymi. Nie chcym tu szyrzić żodnego nacjonalizma, ale fórt móm w czepani to jejich NENI jak chciołech se za socjalizmu u nich kupić tajle to moji Skody. Mjyjcie sie wszedcy dobrze i rychtujcie sie do roboty na pyndziałek. Dzisiejszy tekst ma tytuł "Bez żodnej flinty".
|
reklama
|
Dodaj komentarz