Kapkem nafutrowoł

Nie wiym skyrs czymu ty nasze miastowe gołymie naroz obsiadły dach starostwa, ale sie mi zdo, że kierysi musioł im wyłoślić, kiery dach w Cieszynie je nejważniejszy. Isto nad tym porozmyślały i tyn dach downego biurowca CEFANY bardziyj im spasowoł. Możne, że je to skyrs tego, że tyn dach je bardziyj plaskaty i łóne ś niego nie ukielznóm. Kiejsi wszecki dachy na cieszyńskim rynku były aż czorne łod gołymbi, a na mycce naszego “Floryjana” dycki siedzioł jejich herszt. To ni ma wszecko, bo eszcze isto łóne prziszły na to, że na tym dachu, mogóm se siednóć na solarach, kiere dowajóm tustelokóm sztróm. Wiela tego sztrómu idzie kansi s tego dachu drótami do ludzi, tego nie wiym, ale na zicher jak ty gołymbie to obsiednóm to bydzie go mjynij. Możne, że dobre by było najóńć jakigosi przeganiacza gołymbi, abo każdy dziyń posłać na tyn dach inszego urzyndnika. S tego co wiym, je ich tam tela, że wypadnie na każdego yno roz na pół roku poszpacyrować sie po tym dachu. Coby tam jednak tak ganc po darmu sie nie plyntoł, to trzeja by mu dać jakigosi łobilo, coby ty gołymbie kapkem nafutrowoł. Bo kiejsi na rynku gołymbie futrowały dziecka, a tam kolem tego starostwa ni ma przeca kónska wolnego placu, coby na niego roz za kiedy porem zornek nasuć. Je ich tam przeca tak moc, że ze samego luftu dłogo isto uż nie pożyjóm i ani sie nie obezdrzymy, a gołymbie z Cieszyna kansi sie stracóm. To przeca uż porem roków tymu zrobiły wróble i jaskółki, kierych uż dzisio w Cieszynie nie idzie uwidzieć. A eszcze tak nie downo wszedcy wiedzieli, że jak jaskółki furkały wysoko po niebie, to było to na dobróm pogodem, a dzisio łod pogody mómy uż yno telewizor.

Mini słownik gwary cieszyńskiej:

skyrs - z powodu, wyłoślić - wytłumaczyć, isto - na pewno, ukielznóm - poślizną się, kejsi - kiedyś, mycka - czapka, dycki - zawsze, prziszły na to - wpadły na to, sztróm - prąd, kansi - gdzieś, na zicher - na pewno, poszpacyrować - pospacerować, ganc - całkiem, zornek nasuć - ziarenek nasypać, łobili - zboże, nafutrowoł - nakarmił, luft - powietrze, sie stracóm - znikną, nie idzie uwidzieć - nie można zobaczyć.

Tóż miyjcie sie wszedcy dobrze i wiesiołego popióntku!