Wielkucnie świyntować

Cieszynowi trefiło sie cosi tyn tydziyń jak ślepej kurze zorko, bo gdosi prziszeł na to, coby paszportowóm kancnaryje odewrzić w naszym mieście. Nie wiym skyrs czymu ku tymu trzeja było zegnać aże telkownych ludzi, ale isto to uż je u nas taki zwyk, że bez chwolby nigdy sie nie obyndzie. Przeca stykło by yno ło tym napisać w jakisi cieszyński gazecie abo w internecie i wyszlo by to łacnij. U nas wszecko trzeja dycki wielkucnie świyntować, coby ludzie nieskorzij mieli ło czym rzóndzić, dejmy na to kiery był zaproszóny a nie prziszeł, abo kiery był niedziwnie obleczóny. Jyno czakać, bo możne za rok bydóm isto do tej kancnaryji przignani ci sami ludzi, coby świyncić to, że nie zustała zawrzito i sie obstoła, a tustelocy wyrobili se w ni tela paszportów, że trzeja było insze biura pozawiyrać. Zaś w pyndziałek moc tych kapem posuniónych w rokach chłopów i paniczek i aji tych na pyndzyji, nawszczywiło nasz cieszyński tyjater, coby zaś jak każdego roku zacznóć sztudyrować rozmajte wieca. Dycki to je tak, że jak człowiek uż nie musi każde rano stować do roboty, to mo czas na to, ło czym rozmyśloł przez całe swoji żywobyci. Przeca na pyndzyji moc ludzi eszcze dłógo żyje i może sie czegosi zaimawego wywiedzieć i eszcze sie na cosi swojim przibuznym przidać. Dycki to je tak, że jak człowiek wiyncyj wiy, to wiyncyj poradzi kómósi pumóc. Gdosi kiejsi rzeknył, że na naukem nigdy ni ma za nieskoro i trzeja fórt całe życi sie uczyć, bo nigdy nie wiadómo na co i kiedy ta naszo nauko sie przido.

Mini słownik gwary cieszyńskiej:

zorko - ziarnko, prziszeł na to - wpadł na to, kancnaryja - biuro, odewrzić - otworzyć, skyrs - z powodu, zegnać - zgonić, telkownych - tak dużo, zwyk - zwyczaj, łacnij - taniej, dycki - zawsze, wielkucnie - ogromnie, nieskorzij - później, rzóndzić - mówić, pozawiyrać - pozamykać, niedziwnie obeczóny - skromnie ubrany, kapkem - trochę, pyndzyj - emerytura, nawszczywiło - odwiedziło, wieca - rzeczy, zaimawe - interesujące, przybuzni - powinowaci, nieskoro - za późno, fórt - ciągle.

Tóż miyjcie sie wszedcy dobrze i wiesiołego popióntku!