Bez asyntu

Kiejsi chłapcy szli do poboru na kiery prawiło sie asynt, a dzisio mómy pobór krwie, bez asyntu. Musi być potrzeja moc tej krwie, bo tyn tydziyń n rynku w Cieszynie stoły aże trzi autobusy do kierych wlazowało moc młodzioków. Możne, że łóne przijechały skyrs tego aże trzi, bo je to uż dwacato tako akcyja na naszym cieszyńskim ryku i kierysi chcioł isto pokozać jako my to uż zbogatli. Kiejsi, co na iste bydóm pamiynać posunióni w rokach tustelocy, coby oddać te swojóm krwie, trzeja było iś do szpitola w kierym egzystowoł taki punkt s jegłami do pichanio w żyły. Mómy dzisio tej wygody wszyndzi pełno i jak tak dalij pudzie to za chwiliczkem nie trzeba bydzie ło niczym ani do przodku rozmyślać. Ni ma to dobre dlo naszych muzgownic, bo dochtorzi prawióm, że jak łón ni ma gimnastykowany to na staroś bydymy mieć ostudem s pamiyncióm. Chłapcy i dziywczynta fórt se myśłóm, że dycki bydóm młodzi i takim to sie nie przemówi do rozumu, chocioż by nie wiym co. Nic nie trzeja zapamiyntować, bo każdy mo dzisio w kapsie smartfóna, kiery wszecko wiy i jak sie go rożnie to idzie sie go o wszecko spytać. Uż ani ło tym nie rozmyślóm, coby sie na świecie porobiło jakby chybiło sztrómu, bo bez niego mało gdo dzisio obynś sie poradzi. Wszecko je dzisio na sztrómm i skyrs tego jak to tak dalij pudzie to ludziska nie bydóm se poradzieć ani porachować we swoji czepóni wiela je dwa razy dwa. Bez sztrómu to możne eszcze gdosi poradzi yno królikóm trowe kosóm abo kosokym zesiyc i nabrusić jóm nieskorzij osełkóm. Spółmiołech se eszcze, że nikierym sztróm je aji przydajny przy szpacyrowaniu, bo bez porachowanio kroków żodyn szpacyr sie dzisio nie rachuje, a musi to zrobić sztróm w jego smartfónie.

Mini słownik gwary cieszyńskiej:

kiejsi - kiedyś, asynt - pobór do wojska, wlazowało - wchodziło, dwacato - dwudziesta, na iste - na pewno, egzystowoł - funkcjonował, jegła - igła, do pichanio - do kłucia, dochtorzi prawióm - doktorzy mówią, ostuda - kłopot, fórt - ciągle, dycki - zawsze, w kapsie - w kieszeni, sie go rożnie - się go włączy, poradzieć - potrafić, czepóń - głowa, sztróm - prąd, kosok - sierp, nieskorzij - później, przidajny - potrzebny, bez porachwanio - bez policzenia.

Tóż mjyjcie sie wszedcy dobrze i wiesiołego popióntku