Rozmajci flintkorze

Ni ma latoś na rynku w Cieszynie moc tych bud w kierych sprzedwane sóm świónteczne wieca, bo isto każdy uż mo dóma pełne kiśnie tych rozmajtych malowanych wajec, zajónców i inkszych wilkanocnych wiecy. Nejwiyncyj pod tymi budami widać jednakowóż wszelijaki maści zajyncy, bo łóne isto majóm nejwiynksze wziyńci. Zajyncy w lasach i na rozmajtych posiónkach abo inkszych rajczulach fórt u nas ubywo, to możne chocioż dało by sie tam powstyrkować ty ibryczne, kierych pełno widać dzisio pod tymi budami. Eszcze nie tak downo szło wszyndzi uwidzieć pełno zajyncy, ale jak gojni i rozmajci flintkorze sie wziyli za nich, to za chwiliczem isto bydymi łoglóndać ich yno w ZOO. Nie wiym czy gojni w zimie ty zajónce jakosi opatrujóm, ale isto jak ich tak fest ubywo, to możne, że zima im nie słóży i nieskorzij ni majóm żodnej chynci, coby porem razy do roka sie łokocić. Dzisio mómy taki czasy, że w każdym kszefcie idzie uwidzieć na regałach też rozmajte zajónce i skyrs tego na rynku przi tych budach, nie szmatle sie tam za moc ludzi. Przed Godami to na rynku stoł tam wielki ustrojóny strómek i dwa rynifery zaprzóngnióne do świycóncych sónek i skyrs tego chocioż dziecka miały uciechem pogónić se doopkoła tych wiecy. Na Wielkanoc jakosi żodyn nie prziszeł na to, coby jakigosi wielkigo świycóncego zajónca tam postawić i skyrs tego ni ma też tam isto przi tych budach żodnego ruchu. Dobre by możne było do tych sónek kiere przed Godami tam stoły, zaprzóngnóć dwa wielki zajónce, a w tym miejscu kaj stoł strómek, wstyrczyć do ziymi wielki dróciane wajco.

Mini słownik gwary cieszyńskiej:

latoś - w tym roku, buda - stragan, wieca - rzeczy, isto - zapewne, kiśnia - skrzynia, wajca - jajka, posiónek - pastwisko, rajczula - ogrodzone pastwisko, powstyrkować - powtykać, ibryczne - zapasowe, gojny - gajowy, flintkorz - myśliwy, fest - mocno, opatrujóm - opiekują się, nieskorzij - później, kszeft - sklep, skyrs - z powodu, nie szmatle sie - nie spaceruje, Gody - Święta Bożego Narodzenia, strómek - drzewko, nie prziszeł na to - nie wpadł na pomysł, kaj - gdzie, wstyrczyć - wetknąć.

Tóż mjyjcie sie wszedcy dobrze i wiesiołego popióntku